Compostela, 14/03/2026 – O Ateneo de Santiago organiza o vindeiro luns, ás 19.30 horas e coma sempre na Rúa do Vilar, 19, unha nova sesión do ciclo Luns do Ateneo coa conferencia titulada «Seguridade e salubridade dos produtos do mar».
A charla será impartida por Covadonga Salgado, directora do Instituto Tecnolóxico para o Control do Medio Mariño de Galicia (INTECMAR), quen abordará os sistemas de control e as garantías sanitarias que permiten asegurar a calidade dos produtos mariños.
O INTECMAR é o organismo público responsable do control da calidade do medio mariño en Galicia e da aplicación da lexislación técnico-sanitaria sobre os produtos do mar. Entre as súas funcións destacan o seguimento das patoloxías que afectan aos moluscos bivalvos, a vixilancia das biotoxinas mariñas e a observación do océano, así como a actuación fronte a episodios de contaminación mariña accidental.
O seu labor sitúa a Galicia á vangarda no ámbito do control sanitario mariño e resulta fundamental para a economía das zonas costeiras, especialmente para o marisqueo e a acuicultura, ao garantir a comercialización segura dos moluscos producidos no país.
Covadonga Salgado Blanco é doutora en Ciencias Químicas e licenciada en Farmacia pola Universidade de Santiago de Compostela. Tras unha estancia predoutoral na Universidade de Berkeley, desenvolveu unha longa traxectoria profesional na administración pública galega, ocupando diferentes responsabilidades en ámbitos relacionados coa saúde pública, o control alimentario e a seguridade laboral.
Dende abril de 2009 dirixe o INTECMAR, institución á que leva vinculada máis de 25 anos e que foi designada en 2021 pola Axencia Española de Seguridade Alimentaria como Laboratorio Nacional de Referencia de Biotoxinas Mariñas.
Ademais de participar en numerosos proxectos de investigación e publicacións científicas, colaborou como experta internacional en inspeccións e programas formativos da Unión Europea e en consultorías da FAO.
