A Deputada Saleta Chao con representantes do Coto
Negreira, 23/04/2026 – A deputada do Bloque Nacionalista Galego, Saleta Chao, levou ao pleno do Parlamento de Galicia a situación do CEIP O Coto de Negreira. Chao exixiu ao conselleiro de Educación, Román Rodríguez, unha “rehabilitación integral e urxente” do centro e denuncio que acumula anos de “absoluto desleixo” por parte do goberno autonómico.
A deputada nacionalista detallou as múltiples deficiencias estruturais do CEIP O Coto: incumprimento da normativa de accesibilidade, cun ascensor que mesmo ten escaleiras nalgúns niveis; unha instalación eléctrica obsoleta que provoca continuos apagóns diarios, comprometendo equipos electrónicos e a refrixeración de alimentos e medicación; auga marrón polas tubaxes; humidades, buratos nas portas e deterioro xeral de pavimentos e corredores.
Saleta Chao tamén lembrou que a comunidade educativa leva “moitos anos loitando” por unha actuación definitiva, obtendo só “parches” que non resolven os problemas de fondo. Criticou ademais que, a pesar de que o BNG rexistrou unha iniciativa o 25 de marzo, a Delegación Territorial de Educación visitou O Coto o 15 de abril “como se fose a primeira vez que escoitaban falar do tema”, e lamentou que o novo delegado –a quen acusou de ter “méritos en machismo e apoloxía do franquismo”– non asumise ningún compromiso concreto.
“Señor conselleiro, ten pensado impulsar a rehabilitación integral deste centro ou van seguir mirando para outro lado?”, preguntou Chao, que subliñou o recorte orzamentario en infraestruturas educativas por parte da Xunta.
