Compostela, 24 de maio do 2024 – O IES Rosalía de Castro ven de anunciar os finalistas no premio de novela Arcebispo Juan de San Clemente nas tres categorías: lingua galega, lingua castelán e lingua estranxeira.
O Arcebispo Juan de San Clemente está organizado polo IES Plurilingüe Rosalía de Castro de Santiago de Compostela coa colaboración da Xunta de Galicia a través da Consellería de Educación, Ciencia, Universidades e Formación Profesional.
Hotel Carioca, libro de Antón Riveiro Coello editado por Galaxia; Diario de dúas casas, título de María Villamarín do selo Euseino? Editores, e O ano das mazas, obra de Montse Ferreira Fervenza publicado por Xerais son as finalistas no apartado de novela en galego.
O San Clemente en lingua castelán decidirase entre La naturaleza secreta de las cosas de este mundo, novela do arxentino Patricio Pron editada por Anagrama; Literatura infantil, do chileno Alejandro Zambra e tamén editada por Anagrama; e No te veré morir, volume do andaluz Antonio Muñoz Molina lanzado por Seix Barral.
Para o galardón en idioma estranxeiro, as obras finalistas son: Una salida honrosa, do francés Éric Vuillard (Tusquets); Miradnos Bailar, da autora francomarroquí Leïla Slimani, e El retrato de casada, da británica Maggie O’Farrell (Libros del Asteroide).
Así se deu a coñecer nun acto coa prensa no que participaron o secretario xeral de Política Lingüística da Xunta, Valentín García; o director do IES Rosalía de Castro, Xavier Mouriño; a xefa de departamento de Lingua Castelán do centro e coordinadora do Premio San Clemente, Marta Gende, e a profesora de Lingua Galega, Sira Vidal, quen falaron da escolla de finalistas e dos argumentos das obras.
Durante a presentación desta 28ª edición, lembrouse a singularidade deste galardón no que a decisión final recae, tras unha selección previa realizada por unha comisión conformada polo profesorado implicado do IES Rosalía de Castro, no alumnado de bacharelato do propio instituto compostelán e tamén doutros centros convidados a participar, tanto de Galicia coma do exterior.
“O alumnado é o auténtico protagonista destes galardóns, os alumnos e as alumnas conforman os xurados”, incidiu Gende, antes de engadir que en cada edición se invita a participar a institutos públicos de toda Galicia e de Europa e que o día da entrega os autores e autoras premiadas comparten convivencia e cea co alumnado.
Nesta 28ª edición, cuxas obras gañadoras se darán a coñecer no curso 2024/2025, participarán un total de dez centros: o IES do Sar (Santiago), o IES de Brión (A Coruña), o IES Aquis Celenis (Caldas de Reis, Pontevedra), o IES Gregorio Ordóñez (Sarria, Lugo) , o IES Universidade Laboral (Ourense), o IES Ramiro de Maeztu (Madrid), o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemania), a Hockerill Anglo European College (Reino Unido) e o IES Rosalía de Castro.
Esta mañá tamén houbo tempo para percorrer a historia destes galardóns, postos en marcha no ano 1993 da man da Asociación Cultural Instituto Rosalía de Castro e grazas ao impulso de profesores xa xubilados no centro, como o antigo director Ubaldo Rueda Maribel Martín, Margarita Prado e Rosa López.
Ao longo de case tres décadas, sinaturas tan reputadas como as de Paul Auster, Haruki Murakami, Antonio Tabucchi, José Saramago, Mario Vargas Llosa, Carmen Martín Gaite, Almudena Grandes, Manuel Rivas, María Reimóndez, Anxos Sumai ou Pedro Feijóo recibiron este galardón que, na pasada edición, levaron Sica Romero por Avelaíñas eléctricas; Brenda Navarro por Ceniza en la boca e Nell Leyson por La escuela de canto.
