A xestora do PP de Padrón acorda explorar co BNG “calquera posibilidade remota” para cambiar o goberno pese a que os nacionalistas xa expresaron a súa negativa a esa posibilidade.
Os orzamentos vinculados á moción de confianza en Padrón levaron ao Partido Popular a intentar conseguir o apoio do BNG para unha moción de censura que cambie o goberno municipal.
Nun comunicado explican que a Xunta Xestora do Partido Popular de Padrón acordou explorar “calquera posibilidade por remota que sexa” de abrir unha canle de diálogo coa concelleira do BNG, Bea Rei, para “sondear as opcións” de artellar unha moción de censura que permita cambiar o goberno.
Desde BNG de Padrón Beatriz Rei explica que do mesmo xeito que se sentan a falar co Psoe, están dispostos a sentarse co PP pero deixa claro que non hai ningunha posibilidade de que se acorde unha moción de censura.
O presidente da Xestora, Ángel Rodríguez Conde, asegura ser “perfectamente consciente” de que a edil nacionalista xa avanzou no pleno que non apoiaría ningunha moción de censura, pero anímaa publicamente a “priorizar os intereses xerais de Padrón máis aló das diferencias ideolóxicas”.
Segundo Rodríguez Conde, tras o pleno do martes abriuse un período dun mes que é “unha boa oportunidade para situar na axenda política de Padrón os asuntos e proxectos realmente importantes e para poñer fin a un goberno socialista e a un alcalde con preocupantes tics autoritarios”.
O actual voceiro do PP engade que “Aquí non se trata de quitar a Anxo Rei para poñer a Ángel Rodríguez Conde. Nin sequera se trata do futuro político persoal meu ou de Bea Rei. Aquí estamos a falar de ter a altura de miras suficiente para que Padrón poida concretar a curto e medio prazo proxectos estratéxicos para transformar o municipio e mellorar a calidade de vida da veciñanza”, enfatizou.
Críticas aos orzamentos
Rodriguez Conde pon o foco sobre algúns dos aspectos dos orzamentos que se aprobaran se non se presenta a moción de censura. O concelleiro do PP di que son uns orzamentos “perigosos” porque porán nas mans do alcalde máis de 650.000 euros “para caciquear”, xa que non teñen destino definido.
“A consignación de 15.000 euros para accións de memoria democrática é a mellor proba de que o alcalde vive no seu propio mundo e antepón cuestións ideolóxicas a traballar en sintonía con outras administracións para conseguir proxectos beneficiosos para Padrón”, indicou Rodríguez Conde.
About the Author
