Brión, 03/03/2026 – As veces as chuvias levan por diante o pouco que queda. En Brión ademais da Ponte de Vidaloiso, en Bastavales, acabaron tamén coa tranquilidade institucional e socialistas e nacionalistas crúzanse acusacións.
O Bloque Nacionalista Galego de Brión reprocha a “falta de lealdade institucional” do alcalde de Brión, Pablo Lago, e o seu “servilismo” coa Xunta de Galiza. A crítica nace dunhas declaracións do rexedor nas que aseguraba que o arraxo da Ponte estaba comprometido pola Deputación.
O voceiro nacionalista, Xosé Penas, asegura que o alcalde realiza “afirmacións manifestamente falsas” que non só comprometen a outras institucións, senón que “botan sombra de dúbida sobre procesos públicos que son transparentes e garantistas”.
Penas é, ademais de concelleiro, responsábel da Área de Patrimonio da Deputación nega ese compromiso e “esíxelle unha rectificación tan pública como foi a súa entrevista”. O nacionalista explica que “A axuda solicitada polo Concello forma parte dunha liña de subvencións que aínda está en fase de avaliación e, polo tanto, non resolta”.
O concelleiro e Deputado aproveita para engadir que “a ponte de Vidaloíso levaba anos nun estado de absoluto abandono por parte do Concello de Brión e co completo desinterese da outra administración con competencias, a Xunta, a través de Augas de Galiza”.
O nacionalista di non entender os eloxios do alcalde ao goberno autónomo e lembra que en novembro pasado, nunha asemblea aberta da veciñanza de Bastavales, a necesidade de rehabilitar a ponte canto antes e volvela abrir ao tráfico “era un clamor”.
