Unha nota de prensa do BNG de Padrón, respondida con outra do goberno municipal deixan enriba da mesa a situación da escola infantil municipal.
A portavoz nacionalista, Beatriz Rei, urxe ao goberno municipal presidido por Anxo Rei a “solucionar a situación en que se atopa a escola infantil e buscar novas vías para garantir o servizo ás familias de Padrón. Lamenta que, até o momento, o goberno do PSOE o único que fixo foi desmantelar o pouco que había e obrigar á veciñanza a buscar solucións fóra do concello”.
Rei pon o foco na “difícil situación que o goberno dirixido por Anxo Rei está a poñer á empresa que xestiona a Escola Infantil con presións e a demora dos pagos o que provoca a súa asfixia que pode levar a determinacións como decretar a quebra ou pechar a escola, o que deixaría a Padrón sen servizo”.
A escola infantil foi trasladada de xeito provisional a Carcacía no ano 2023 polas deficiencias do inmoble do centro urbano. O BNG enuncia que tres anos despois a situación segue igual o que “obrigou ás familias a desprazarse ou mesmo a mudar a outras escolas municipais de concellos próximos”.
O BNG incide que a baixa na demanda “puxo nunha complexa posición tamén á empresa xestora, con menos matrículas e aulas e redución tamén da cantidade que recibe da Xunta, o que se agrava aínda máis pola débeda contraída polo concello de quen non recibe a subvención da Xunta nin a contía mensual municipal desde o mes e outubro”.
Desmentido do goberno municipal
Pola súa banda o goberno socialista de Anxo Rei desminte estas informacións. Nun comunicado comeza dicindo que as denuncias non están avaladas por “escrito de queixas presentado por familias, nin reclamacións formais”.
Anxo Rei, afirmou que “estamos ante un ataque político claramente electoralista, no que se xera alarma social a costa dun servizo esencial, sen datos e sen rigor”. Lembra que o traslado da Escola Infantil de Padrón realizouse por motivos estritamente técnicos e de seguridade, xa que o edificio anterior, en proceso de licitación, conta cun informe de insalubridade emitido polos técnicos municipais de Urbanismo.
Desde o Concello aclárase tamén que todas as facturas municipais se abonan dentro dos prazos legais e que non existe ningún impago pendente relativo á escola infantil municipal. A información económica correspondente está recollida nas Xuntas de Goberno, de carácter público.
En relación coa subvención autonómica, o goberno local lembra que o atraso no pagamento por parte da Xunta ata o mes de xaneiro non depende do Concello, que cumpriu coas súas obrigas ao presentar a solicitude da subvención en tempo e forma, motivo polo cal foi concedida.
O alcalde subliñou ademais que “é importante dicir toda a verdade: o custo total anual da escola infantil é de 96.586,16 euros, sen incluír o transporte escolar, e a achega da Xunta non chega nin ao 20 % desa cantidade”. “O Concello asume máis do 80 % do custo real do servizo e, ademais, financia integramente un transporte escolar municipal gratuíto cando a competencia das escolas infantís é da Xunta”, engadiu.
O alcalde engade tamén que “A continuidade da escola infantil municipal acredítase con feitos e investimentos, non con palabras. Non se destinan 830.857,17 euros á rehabilitación dun servizo que se quere pechar. Esta inversión demostra un compromiso claro coa escola infantil e responde, ademais, á necesidade de corrixir anos de falta de mantemento do edificio, unha situación herdada de gobernos do PP e visible noutras infraestruturas municipais que a veciñanza coñece ben”.
