Compostela, 21/03/2026 – O Ateneo de Santiago ten prevista para este próximo luns 23 de marzo, ás 19.30 horas, na Rúa do Vilar, 19, unha nova conferencia dos Luns do Ateneo. En esta ocasión realízase en colaboración coa Fundación Xosé Neira Vilas.
A actividade levará por título «A obra poética de Neira Vilas» e contará coa intervención do escritor e editor Miguel Anxo Fernán Vello. A conferencia propón unha aproximación á dimensión poética da obra de Xosé Neira Vilas, unha faceta menos coñecida do autor de Memorias dun neno labrego, pero fundamental para comprender a súa traxectoria literaria.
A sesión abordará as claves da súa escrita lírica, a súa relación coa experiencia vital da emigración e o modo en que a súa poesía dialoga coa memoria, a identidade e a realidade social galega.
O encargado de impartir a conferencia será Miguel Anxo Fernán Vello (Cospeito, 1958), poeta, dramaturgo e editor, considerado unha das voces máis destacadas da poesía galega contemporánea. Fundador do selo Espiral Maior, referente da edición poética en Galicia, é autor de preto dunha vintena de libros de poesía, entre eles Seivas de amor e tránsito, As certezas do clima, Capital do corpo, Habitación do asombro ou Duración da penumbra.
Estes libros foron galardoados con premios como o da Crítica Española, o Esquío ou o Miguel González Garcés. Ademais, desenvolveu un amplo labor como articulista e publicou libros de conversas con figuras como Ricardo Carballo Calero ou Xosé Manuel Beiras.
