A Pobra, 30 de decembro do 2021 – A Torre de Bermúdez, sede do museo Valle-Inclan, recibiu nas últimas semanas obras de mellora na súa cuberta.
A Torre de Bermúdez está declarada como Monumento Histórico-Artístico de carácter nacional e Ben de Interese Cultural (BIC). Segundo explicaron o alcalde, Xosé Lois Piñeiro, e a concelleira da Cultura, Patricia Lojo, atendeuse a conservación de urxencia da cuberta do torreón propiamente dito para evitar filtracións, polo cal se levaron a cabo traballos de retirada da vexetación existente e substitución das tellas desprendidas e rotas.
Anunciaron, ademais, a previsión de que as tarefas prosigan en 2022 na cuberta da zona expositiva anexa á Torre. Tamén indicaron que dende a Administración local se está estudando un convenio coa Consellería da Cultura que contempla a restauración de tódalas fachadas e a recuperación da pedra do inmoble. Neste senso, trasladaron o compromiso por parte do Concello para protexe-lo patrimonio público.