O concelleiro de Medio Ambiente da Pobra, Xosé Lois Piñeiro, confirmaba este martes que solicitarán informes á Demarcación de Costas do Estado, á Xunta de Galicia e ao Instituto Tecnolóxico do Medio Mariño de Galicia (INTECMAR) tras o último vertido rexistrado na Ribeiriña.
Segundo o edil o Concello da Pobra non recibiu “ningunha comunicación oficial” por parte dos organismos competentes en relación co último vertido, ocorrido hai aproximadamente unha semana.
A pesar desta falta de información previa, o Concello puido saber que a vertedura foi “de escasa entidade” e que quedou solucionada poucas horas despois grazas á intervención do servizo de Salvamento da Xunta de Galicia.
Piñeiro subliñou que, malia tratarse dun episodio de pouca envergadura, resulta “esencial que esta situación se resolva á maior brevidade posible”. O concelleiro tamén avanzou que se solicitará a documentación relativa á investigación analítica realizada pola Demarcación de Costas e na que, segundo as informacións publicadas nos últimos días, se constatou a presenza de hidrocarburos que se filtran ao mar, especialmente en días de mal tempo. Ademais, o Concello interesarase polo estado de tramitación e os prazos de presentación do proxecto que a Demarcación de Costas debería presentar no prazo de tres meses.
