A Pobra, 3 de marzo do 2022 – O concello da Pobra combina nas vindeiras datas o fin do Entroido coa conmemoración do 8 de Marzo.
O enterro do Felipiño do Maño no 5 de marzo marcará o remate do Entroido na Pobra do Caramiñal, unha iniciativa organizada por veciñanza de Xobre coa colaboración do Concello.
A saída está previsata para as sete da tarde e a queima a carón da praia dos Areos, pasada a medianoite.
Igualdade, contacomigo
Baixo o lema “Igualdade, conta comigo!”, as actividades desenvolveranse ó longo de todo o mes. A concelleira da Igualdade, Charo Varela (Nós Pobra), manifestou que, a través deste emblema, “trátase de implica-la cidadanía e convidala a asumi-la súa parte de responsabilidade cara a cambia-la sociedade actual por unha sociedade máis igualitaria.” Así mesmo, sinalou que “é un día importantísimo sobre o cal hai que mante-la reivindicación ano tras ano”, pois “queda moito por facer.”
Programación
O paso do Entroido ás actividades en torno ao 8 de marzo comezarán ese mesmo día cinco. Ao tempo que se enterra ao Felipiño terá lugar A festa das mulleres, no Cantón da Leña a partir das seis e media da tarde.
A festa consistirá nunha foliada e faladoiro feministas. Participarán os grupos Xiada, Arrancadeira e Eiradela, que interpretarán unha adaptación feminista e actual das músicas tradicionais.
Para o propio 8 de marzo propónselles ós centros da educación infantil e da primaria a elaboración dun gorro de papel clásico con cartolina violeta que incorpore o lema escrito para, posteriormente, formar arredor de cada centro de estudos unha cadea humana portando unha pancarta na cabeceira.
Nese mesmo día terá lugar a marcha feminista que dará comezo ás 20.00 horas na praza Alcalde Segundo Durán e percorrerá as rúas peonís ata chegar á casa consistorial, onde se procederá coa lectura do manifesto que propón a Federación Galega de Municipios e Provincias (Fegamp).
A xornada do sábado 12 contará coa representación da peza teatral Comando comadres, da compañía Matrioshka Teatro. Trátase dunha función en clave de humor e con carácter feminista que se organiza de xeito transversal dende o Servizo de Normalización Lingüística do Concello e financiada pola Rede de Dinamización Lingüística da Xunta. Transcorrerá no teatro cine Elma, ás 20.00 horas.
En coordinación coa área da Igualdade da Deputación da Coruña, na seguinte fin de semana achegarase a obra teatral Bravas: unha historia das nosas mulleres, protagonizada por Isabel Risco, quen ofrece a súa particular visión da historia das mulleres galegas. Será no día 19, ás 20.00 horas, no teatro cine Elma.
E, finalmente, na xornada do 26 proxectarase A poeta analfabeta, un documental dirixido por Sonia Méndez e gañador dun dos premios Luísa Villalta en 2019. Achegaralle ó público asistente a figura de Luz Fandiño, o seu mundo, a súa escritura e o que a move a escribir. Tamén se levará a cabo en coordinación coa área da Igualdade da Deputación da Coruña, no teatro cine Elma, ás 20.00 horas.
