Compostela, 27/02/2026 – Os plenos municipais deberían servir para resolver cuestións e case sempre é así. Sen embargo parece que certas cuestións en Compostela son a pedra de Sísifo e cando chegan ao pleno volven ao principio.
Resulta imposible resumir os plenos de Compostela, pola súa duración, nun artigo pero si podemos deternos nos dous puntos que marcaron a sesión de este xoves: auga e colexio Santiago Apóstolo.
Auga que non has de beber…
A xestión da auga en Compostela é un penitencia que, por algo que a veciñanza non sabe, tense que pagar; só así se explica todo o que leva pasado.
O pleno de onte foi un novo capítulo pero non o último. Para os desmemoriados lembramos que o único que se conseguiu nas últimas décadas foi construír a nova depuradora.
Impulsouse o proceso no mandato 2015 – 2019 sendo alcalde Martiño Noriega e o modelo elixido foi criticado por todo o mundo ata que non quedou máis remedio que aceptar que era unha boa solución.
Hai que comentar isto para lembrar que sempre é mellor facer algo que non facer nada. Nas eleccións do 2019 Bugallo dicía que a licitación da xestión da auga a deixaran para despois das eleccións de acordo co Partido Popular para non enlamar os comicios. Pos o barro segue presente seis anos despois.
O resumo do sucedido e sinxelo. Creouse unha comisión para decidir cal modelo de xestión era mellor. Sen entrar en valoracións, a comisión decidiu cos votos a favor do Psoe e do PP que era a concesión. Lévase a pleno para que a decisión se formalice e o PP abstense polo que todo o traballo realizado nos últimos meses non serve para nada.
Borja Verea argumenta que “non pode deixar que xestione a licitación da concesión en mans de quen non cre en ela”.
A pregunta aparece de contado, entendemos que si Borja Verea chega a ser alcalde non fará nada no que non crea? Iso pode levar a que as peticións dunha boa parte da poboación queden no camiño ata que chegue alguén que os escoite. Ao final o que prevalece non son as normas, son as valoracións persoais.
Colexio Santiago Apóstolo, autonomía si pero…
De novo na cuestión do cambio de nome do Colexio Santiago Apóstolo o que manda son as visións persoais e non a normativa.
Asociación de Pais e Consello Escolar deciden por unanimidade solicitar o cambio de nome do Colexio polo de Almáciga. Reunen a documentación e piden ao goberno local que o leve a pleno, requisito previo antes de que chegue á Consellería de Educación que é a que decide.
O posicionamento do Partido Popular foi claro desde o principio “o nome é un símbolo da cidade e o cambio afecta a toda a cidade”. Esquecen que no pleno non se toda a decisión de cambiar o nome, só se facilita que o colexio poda facer á petición á Consellería.
De novo aparecen preguntas. Si hai unha normativa clara que se cumpre desde o principio e o voto de un partido faise en función da valoración subxectiva dos seus concelleiros, non se está poñendo por riba das normas a opinión persoal? Máis aínda cando non se toma unha decisión e só se autoriza un trámite… que decida o lector.
A postura do grupo de non adscritos é similar. Consideran que se poden usar os dous nomes, que non hai necesidade de quitar nada e que e mellor “convivir”.
En este caso tamén se está deixando de lado á comunidade educativa que, despois dun proceso de dous anos, presenta unha proposta moi concreta. Non pregunta que vos parece? Di “queremos isto e precisamos que o tramitedes”.
Comeza pronto a campaña
Levamos en campaña electoral desde o inicio do mandato e aínda queda algo máis dun ano. O problema non é todo o ruído innecesario que se produce, é un xeito de facer política que a un lles convence e a outros non e coa que hai que convivir.
O problema e cando ese xeito de facer política paraliza avances. Cando accións concretas con consecuencias concretas que afectan á cidadanía quedan no camiño ata que alguén as poida recuperar.
O pleno pódese ver íntegro na canle de Youtube municipal
