A oposición do goberno municipal de BNG e Compostela Aberta segue empeñada en demostrar a minoría en cada pleno, decidindo en esta ocasión que facturas se pagan e cales non.
O pleno ordinario de xuño deixou de novo á vista a posición dos distintos grupos. O PP exercendo de oposición dura, os non adscritos buscando un apoio que demostre que son necesarios e os dous edís do Psoe intentando buscar un difícil equilibrio.
O exemplo máis claro é o recoñecemento extraxudicial de crédto que permitiría pagar o que se lle deben a dúas empresas de transporte. Tralusa e Rías Baixas fan agora a maioría dos servizos, é difícil negas que fixeran o traballo pero critícase que non houbera unha fiscalización previa e dubídase dos custos.
O PP votou en contra de ese pago e os non adscritos abstivéronse nunha demostración de poder fronte ao goberno municipal. Eses votos fixeron que o punto fora rexeitado. O goberno Municipal explica que os expedientes se iniciaron en tempo e forma, que complicacións co persoal retrasaron o expediente e que de non facerse igualmente deixaríase de prestar o servizo.
Outros dous recoñecementos extraxudiciais si foron aprobados cos votos de BNG, Compostela Aberta e Psoe e a abstención de PP e non adscritos. Máis de un millón de euros que irán na súa maioría a pequenas empresas, asociacións e autónomos.
Declaración LGTBQ+
O pleno aproba unha declaración con motivo do día do orgullo na que se reafirma o compromiso institucional coa defensa dos dereitos das persoas LGBTIQ+. A Corporación se reafirma no apoio municipal ás mobilizacións e actos convocados polo movemento LGBTIQ+ no 28 de xuño, “recoñecendo o seu valor como ferramenta de visibilización e loita polos dereitos humanos”. O Pleno arrancou ademais cun minuto de silencio polas últimas vítimas da violencia machista.
Noutra orde de cousas, tamén se aprobou a proposta da Alcaldía para a concesión de títulos, honras e distincións ao Irmán Mariano; ao último alcalde de Enfesta, Manuel Balado; e ao sindicalista Ramón Reboiras. O punto recibiu o voto favorable de BNG, CA, PSOE, concelleiro e concelleiras non adscritas e a abstención do PP.
Outros asuntos
No pleno de hoxe tamén se aprobou por unanimidade a proposición para impulsar a reserva de contratos reservados a centros especiais de iniciativa social e a empresas de inserción, presentada polo grupo municipal do PSdeG-PSOE; así como a moción para instar ao Goberno do Estado a dar cumprimento á disposición adicional sexta da Lei 21/2021, de 28 de decembro, e realizar unha auditoría independente das contas da Seguridade Social presentada polo BNG, CA e concelleiro e concelleiras non adscrito/as.
