O Pino, 15 de marzo do 2021 – O Psoe do Pino pide a retirada de xel hidroalcohólico repartido polo concello xa que non cumpre a normativa obrigatoria.
O grupo socialista do Pino lembra que as condicións de estes xeles figuran estipuladas no Anexo V do Regulamento 528/2012 do Parlamento Europeo e do Consello, de 22 de maio de 2012, relativo á comercialización e uso de biocidas. Normativas que se poden consultar na web da AEMPS.
Os socialistas denuncian que o concello de O Pino doou xel hidroalcohólico entre os distintos establecementos, comercios locais, escola unitaria de Gonzar e CPI, etc…, “que non está homologado como biocida, que carece do etiquetado que esixe a normativa, e que pode estar a dar unha falsa sensación de seguridade entre a veciñanza”.
Afirman tamén que o produto que repartiu o concello carece da autorización da Axencia Española de Medicamento e Produtos Sanitarios (AEMPS), posto que nin a marca nin o fabricante figura na lista que ten publicada este organismo. “Podemos entender que fai un ano, coincidindo co inicio da pandemia, e dada a escasa oferta deste tipos de produtos, se puidera cometer este tipo de erro, o que non entendemos e que un ano despois siga existindo este produto nas fontes de xel públicas e nos distintos establecementos, cando o Alcalde é coñecedor dos requirimentos feitos polas autoridades sanitarias a algún dos establecementos do noso pobo, e a solución que adoptou: a calada por resposta” apuntan.
Ante estes feitos os Socialistas locais veñen de solicitar por escrito a inmediata retirada do falso xel, e a reposición por unha solución hidroalcohólica avalada, pola Axencia Española de Medicamentos e Produtos Sanitarios (AEMPS), con eficacia viricida demostrada.
