A Estrada, 1 de febreiro do 2022 – O BNG da Estrada instan ao alcalde a que chame ao Ministerio de Transportes para que boten sal na pasarela peonil da N-640 en Río de Sapos en Matalobos.
Os nacionalistas explican que estes días de xeada a pasarela amosa unha imaxe curiosa, pero ao mesmo tempo perigosa, xa que este intenso frío conxela o paso peonil e poden producirse escorregamentos con consecuencias fatais para as persoas que o utilicen.
Hai que ter en conta que esta zona é moi transitada polos veciños e veciñas que a utilizan habitualmente para pasear ou facer exercicio, e esta senda evita que teñan que pisar o asfalto da estrada.
Por outra parte o BNG insiste na necesidade de dotar este treito dunha segunda pasarela na marxe dereita en dirección Cuntis “Non é de recibo que os veciños e veciñas que utilizan ese lado das beirarrúas da N-640 teñan que baixar á estrada para cruzar a ponte”.
