Imaxe duha das edicións da PequeRachada da Baña
A Baña, 21/04/2026 – A área recreativa de Agra de Chans converterase o venres 1 de maio no escenario dunha nova edición da PequeRachada da Baña. Unha cita arredor da música tradicional que pon o foco nas novas xeracións.
A actividade dará comezo ás 13.00 horas e desenvolverase ao longo do día como un espazo aberto de participación, no que a cultura popular marcará o ritmo. A PequeRachada será o eixe dun encontro de escolas de música tradicional de distintos puntos e do propio concello.
No ámbito local participarán as Gaiteiras da Baña, as Pandeireteiras da Baña e Os Trallas da Baña. Xunto a elas estarán a agrupación Rosalía de Castro, de Cacheiras (Teo); OCT Ultreia Pandeireteiras, de Compostela; e a Asociación Cultural Brisas do Quenllo, de Tordoia, que se suman a esta xornada de intercambio arredor da música tradicional.
O programa da PequeRachada inclúe tamén a proposta de narración oral Un saco de contos, de María da Pontraga, unha actividade dirixida a público infantil e familiar que combina historias e cancións de tradición oral. A través de pequenos relatos a sesión convida a descubrir personaxes do imaxinario popular e incorpora momentos de participación pensados para as crianzas.
A PequeRachada nace como un encontro no que a música tradicional se vive desde a base, promovendo o papel das novas xeracións como protagonistas e garantindo a continuidade do patrimonio cultural inmaterial.
O formato aberto da xornada facilita a presenza das familias, que poden compartir o día ao aire libre nun ambiente no que a música e o lecer conviven de maneira natural. A iniciativa está organizada pola Escola de Música Tradicional da Baña e polo Concello da Baña, coa colaboración da ACM Os Campantes da Baña, e consolídase como unha cita de referencia no calendario cultural local.
