Compostela, 20 de novembro do 2018 – Unha semana intensa na Casa das Crechas con 3 bos concertos, Pepe Vaamonde Grupo, Davide Salvado e o domingo que está reservado para Sumrrá.
A semana terá tamén a habitual foliada dos mércores e o xoves recibirá a primeira das citas. Pepe Vaamonde Grupo presenta ‘Nas pedras do lar’, o seu cuarto traballo discográfico da banda galega, baseado en composicións propias instrumentais e temas cantados tradicionais. Nel a creatividade e a esencia da música tradicional galega fusiónanse para ofrecer un espectáculo orixinal e contundente. Este cuarto traballo musical da banda está dedicado ao lume, completando así a súa cuatriloxía discográfica, onde cada disco ten como fío condutor un dos catro elementos naturais. 75 minutos de duración cargados de tradición e modernidade que farán arrincar do peito ao público fortes emocións cheas de novos sabores sonoros.
O venres Davide Salvado despídese de “Lobos” para centrarse no que será o seu novo espectáculo. Con este concerto, Davide, acompañado por Santi Cribeiro (acordeón), Carlos Freire (percusión) e Pablo Dalama (saxo), pon fin a unha xira que levou á banda por boa parte do Estado, Canadá, Finlandia, Bélxica ou Portugal. Davide Salvado é sen dúbida unha das voces máis carismáticas do noso país. De formación autodidacta, leva media vida recorrendo as aldeas na procura de ritmos, coplas e danzas. De todas esas mulleres que se foi atopando, aprendeu non só a tradición na música, senón todo un xeito de vivir. O amor a todas esas prácticas tradicionais e o respecto pola terra, fan do xeito de entender o canto para Davide moito máis que simplemente música.
E o domingo nas Crechas é tempo do trío de jazz galego máis internacional. Sumrrá repasará as músicas máis representativas dos seus 5 álbums. 15 anos que leva Sumrrá traballando de xeito continuado e ininterrompido, converténdoos nun referente do Jazz feito en España.
