Compostela, 5 de maio do 2017 – A Universidade de Santiago de Compostela (USC) xestiona cada ano entre 30 e 40 novas patentes que son resultado do estudo e traballo dos centros e equipos de investigación dos Campus de Santiago de Compostela e de Lugo. A USC conta actualmente cunha carteira de ao redor de 100 patentes que lle xeran cada ano un retorno económico á propia Universidade de Santiago de Compostela de algo máis de 100.000 euros.
Estes datos achegounos Susana Torrente Vilasánchez, técnica superior de Xestión na área de Valorización, Transferencia e Emprendemento da USC, que impartiu unha conferencia celebrada no Edificio Emprendia en Santiago de Compostela sobre As patentes como elemento de valor estratéxico nunha xornada de formación cruzada organizada polo Clúster Tecnolóxico Empresarial dás Ciencias dá Vida (Bioga), que preside Carme Pampín, e a área de Valorización, Transferencia e Emprendemento da USC.
“A USC xestiona cada ano entre 20 e 30 patentes novas”, manifestou Susana Torrente Vilasánchez, quen destacou o “bo nivel da Universidade de Santiago de Compostela”. A experta destaca que das 100 patentes que se xestionan na actualidade moitas xeran retorno durante anos e outras se descartan unha vez que non cumpren as expectativas. Susana Torrente Vilasánchez lembrou que a “Universidade Santiago de Compostela é a propietaria das patentes que resultan dos estudos e traballos dos seus centros e equipos de investigación. Os inventores constan como inventores na patente, pero o titular dos dereitos é a Universidade de Santiago” engade a experta, que fixo na conferencia organizada por Bioga e pola USC un repaso dos dereitos que confiren as patentes e as razóns que motivan a protexer as invencións.
Susana Torrente Vilasánchez explicou toda a traxectoria que require unha patente ata que xera un retorno económico, o seu obxectivo último. “Se non se pode comercializar e non achega un retorno económico esa patente non serve para a súa función, é papel mollado”. A técnica tamén fixo incapié no tempo que poden tardan en xerar retorno económico unhas ou outras patentes. “Nas TIC o retorno é máis inmediato e, por exemplo, no sector biotecnolóxico, onde fai falta un desenvolvemento longo para chegar ao mercado, o retorno económico chega despois de varios anos”.
O labor desta doutora en Química Orgánica especializada en Propiedade Intelectual, Patentes, Marcas, Deseños e Dereito da Competencia, comprende a protección, valorización e transferencia das invencións da USC. Destaca que a Universidade de Santiago rexistra patentes en moitos ámbitos como medicamento, farmacia, bioloxía, química, física, óptica e tamén no sector TIC. “A USC xestiona as súas patentes e busca empresas que se interesen nesas tecnoloxías para que estas continúen co desenvolvemento da tecnoloxía e coa patente ata comercializala”, indica a experta, quen aclara que “a Universidade non pode comercializar porque é unha institución sen ánimo de lucro, pero si pode obter un retorno que reinviste en I+D”.
About the Author
