Frades, 23 de febreiro do 2017 – O Concello de Frades e a Asociación de Veciños Río Samo (Galegos) reclamarán compensacións a Telefónica por ter sen servizo dende hai tres semanas a medio cento de veciños das parroquias de Galegos e Moar.
O alcalde de Frades, Roberto Rey Martínez, explica que “falamos en varias ocasións coa directora rexional e nos asegura que están traballando e revisando as liñas, pero o certo é que dende o temporal non vimos a ninguén de Telefónica por Frades tratando de arranxar a situación. O último que nos dixeron foi que o problema é que se queimaran un quilómetro de liñas, pero a sensación que temos é que nos están dando largas e nós o que queremos é que se arranxe o problema canto antes”.
Cincuenta veciños e veciñas dos lugares de Reboredo e Vista Alegre (Galegos) e Vilarello de Abaixo e Vilarello de Arriba (Moar) permanecen sen servizo de telefonía fixa e internet dende os temporais do pasado 2 de febreiro. “Hai explotacións agrogandeiras e empresas rurais que precisan utilizar Internet para os seus negocios e tamén hai moitos veciños e veciñas que non poden acceder a un servizo polo que están pagando, polo que tamén lle imos solicitar a Telefónica compensacións para os afectados”, explica Roberto Rey.
O alcalde de Frades entende que “nos tempos nos que estamos non é xustificable que cincuenta veciños e veciñas estean sen servizo de telefonía fixa e internet durante tres semanas, polo que instamos a Telefónica a que arranxe os problemas canto antes, indemnice aos afectados e faga todo o posible para que situacións coma esta non se volvan producir”.
