займ срочно

Levan ao Parlamento a reforma integral do CEIP Barrié de la Maza de Santa Comba

0

Bisbarra, 26 de maio do 2023 – A Comisión de Educación do Parlamento de Galicia recibiu a petición do grupo socialista para que se reforme de xeito integral o CEIP Barrié de la Maza de Santa Comba.

Os socialistas pediron ademais que a Xunta de Galicia asumira as actuacións de mantemento no centro Pepe de Xan Baña. A reclamación chega despois de que parte do teito do Barrié caera enriba dunha mestra a finais do pasado mes de febreiro.

A parlamentaria socialista Noa Diez lamentou o voto do PP en contra desta iniciativa, impedindo que saíra adiante. Díaz lembrou que tamén votaran en contra da emenda aos Orzamentos da Xunta para 2023 presentada no mesmo sentido no debate que se celebrou a finais do ano pasado.

Para Díaz é “incomprensible” que o Goberno galego deixe que o Barrié de la Maza, que conta con máis de 400 estudantes, vaia esmorecendo logo de 50 anos de actividade sen rexistrar ningunha actuación de calado para o seu acondicionamento.

Lamentou a “incompetencia do PP” para atender a esta situación, do Goberno galego e da propia alcaldesa de Santa Comba, que en 4 anos non solicitou nin unha soa reunión, ata o pasado mes de abril, coa xefatura territorial de Educación, a pesar de que era unha demanda recorrente do centro nos últimos tempos. 

Malia que a reunión se produciu, a Anpa e a dirección do Barrié de la Maza “volveron igual que foran”, mentres a Xunta e o goberno local “quedaron tranquilos” negando a reforma integral pero anunciando a reforma dos canalóns e un pequeno parque.

Díaz tamén criticou a “arbitrariedade” demostrada polo goberno galego, que nega unha intervención inaprazable nos centros de Santa Comba cando compromete unha reforma -”necesaria, por suposto”, dixo a deputada- de 1,2 millóns de euros no CEIP da Baña, un centro que ten unha comunidade moito menor.

Achacou esta decisión aos “temores electorais” que teñen na Baña logo dunha “burda moción de censura” coa que lle arrebataron a alcaldía ao PSdeG e pensan inutilmente que con esa acción poden manter o goberno, mentres en Santa Comba “están tan resignados a un cambio de signo político que nin se molestan en facer a obra”.

Pepe de Xan Baña

A deputada socialista reclamaba tamén obras de mellora no CEIP Pepe de Xan Baña para non chegar á situación de abandono que sofre o outro centro. Díaz preguntouse se a inacción neste centro se debe a que se confirman as intencións da Consellaría de pechalo en breve, e esixiulle ao PP e ao goberno galego que sexan “transparentes” nas súas intencións cara este centro.

Share.

Comments are closed.