Membros do grupo socialista na mobilización de Cacheiras
Compostela, 22/04/2026 – O Grupo Parlamentario Socialista de Galicia presentará no Parlamento galego unha iniciativa na que demanda da Xunta a elaboración dun informe técnico exhaustivo e independente sobre o proxecto de instalación dunha planta de residuos na parroquia de Cacheiras, no concello de Teo
Os socialistas queren tamén unha paralización “inmediata” da súa tramitación administrativa ata dispoñer desa avaliación. A proposta chega tras a mobilización veciñal que tivo lugar este sábado en Cacheiras, na que participaron preto dun cento de veciños e veciñas e representantes socialistas.
O grupo socialista sinala que esta resposta social evidencia a existencia de preocupacións e dúbidas sobre o impacto ambiental, territorial e sanitario da infraestrutura, así como sobre a súa compatibilidade cos principios de sustentabilidade e co modelo de desenvolvemento do territorio.
Consideran que a Xunta de Galicia debe “asumir un papel activo e garantir que calquera proxecto deste tipo conte con todas as garantías técnicas, ambientais e de participación pública”, evitando a tramitación de iniciativas que poidan xerar conflito social sen unha análise previa completa e independente.
Neste sentido, o Grupo Socialista pide que os servizos técnicos da propia da administración autonómica elaboren un informe no que se analicen os posibles impactos do proxecto de Cacheiras e o cumprimento da normativa vixente, así como a súa adecuación aos criterios de sustentabilidade. Ao tempo, reclama que se suspenda calquera autorización ou avance administrativo mentres non se dispoña desa avaliación. A iniciativa tamén propón a apertura dun proceso de diálogo coa veciñanza de Cacheiras 0e coas entidades sociais da contorna co obxectivo de avaliar alternativas e garantir que as decisións en materia de xestión de residuos conten co maior consenso social posible.
