Ordes, 31 de marzo do 2022 – O conselleiro do Medio Rural, José González, participou na entrega de máis de 1.500 títulos de propiedade rematando así a parcelaria de Beán Pereira.
Xunto ao Conselleiro estivo directora xeral da Axencia Galega de Desenvolvemento Rural, Inés Santé. A parcelaria de Beán Pereira supuxo un investimento de máis de dous millóns e medio de euros.
A superficie organizada chegou a case 1.340 hectáreas, beneficiando a 827 veciños propietarios que viron como a superficie media das súas parcelas se quintuplicaba. Así, pasouse dunhas 9.000 parcelas iniciais a preto de 1.600 predios finais, o que permitiu mellorar a estrutura territorial das explotacións da zona e, por tanto, diminuír os seus custos de produción.
O conselleiro sinalou que a través destes procesos conséguese paliar o minifundismo presente na comunidade galega, dende o punto de vista da estrutura da propiedade, polo que son unha ferramenta fundamental na reorganización do territorio. No concello de Ordes, o 70% da súa superficie xa está concentrado, destacou José González, ao tempo que dixo que en preto de 6.000 hectáreas se entregaron os correspondentes títulos de propiedade e noutras 5.000 ha os veciños xa puideron facer uso dos novos predios de substitución.
Desde o ano 2020 ata a actualidade, a Xunta entregou preto de 20.000 títulos de 18 concentracións parcelarias -sumando a de hoxe- que beneficiaron uns 8.500 propietarios. Neste senso, o conselleiro sinalou que a día de hoxe quedan 94 procesos abertos, pero que en 58 deles os veciños xa están facendo uso das novas parcelas. Por iso, José González reiterou o seu compromiso en seguir traballando na finalización destas parcelarias, para as cales hai un orzamento de 12 millóns de euros en 2022.