Rois, 19/05/2026 – O edificio multiusos de Rois acollerá do 22 de maio ao 11 de xuño a exposición “A pandeireta galega. Actualización dun instrumento ancestral”, unha iniciativa organizada polo Consello da Cultura Galega e o Concello de Rois arredor dun dos instrumentos máis representativos da tradición musical galega.
A inauguración desenvolverase o venres 22 de maio a partir das 18.00 horas coa presentación institucional a cargo da presidenta do Consello da Cultura Galega, Rosario Álvarez; do alcalde de Rois, Ramón Tojo Lens; e dos comisarios da exposición, Luciano Pérez Díaz e Suso Vaamonde Manteiga.
A pandeireta centrará despois unha sesión de relatorios centrada na transmisión dos coñecementos sobre o instrumento, na súa evolución e nas novas formas de interpretación.
Mercedes Autrán Romero ofrecerá a intervención “O caso das pandeireteiras de Rois”, centrada na experiencia dun grupo de nenas ás que unhas avoas cantareiras e unha mestra achegaron a música tradicional hai catro décadas. Durante a sesión tamén se presentarán gravacións orixinais que serán doadas ao Arquivo Sonoro de Galicia.
O programa incluirá ademais o relatorio “A percusión de man no Real Coro Toxos e Froles de Ferrol”, impartido por Arturo Lamas Braña, e a intervención de Suso Vaamonde sobre “O instrumento hoxe”, centrada nas novas técnicas de interpretación, uso e enfoque dos toques tradicionais.
A sesión contará coa participación en directo da Escola de Música e Baile Tradicional do Concello de Outes e permitirá coñecer os primeiros estudos acústicos realizados arredor do instrumento, que tamén pasarán a formar parte dos fondos do Arquivo Sonoro de Galicia.
A mostra ofrece un percorrido arredor da historia, evolución e vixencia da pandeireta galega, un instrumento presente desde antigo na tradición musical popular e especialmente ligado ás cantareiras. A proposta aborda tamén a adaptación da pandeireta aos novos contextos musicais e culturais, así como a importancia de conservar e divulgar este patrimonio sonoro desde unha visión aberta ao presente e ao futuro.
