Bisbarra, 6 de marzo do 2024 – O Concello de Padrón e o Centro de Información á Muller Terras de Iria (CIM) celebran o 8M coa inauguración da mostra “Rumorosas 2024”.
Trátase dunha exposición ao aire libre na que Padrón mostra o seu recoñecemento a oito mulleres polo seu compromiso coa igualdade ao longo da súa traxectoria persoal en diferentes eidos profesionais.
A exposición é parte dun amplo programa de actividades, deseñado desde a concellaría da muller, para conmemorar o Día Internacional da Muller, 8M. A representación da obra de teatro ‘Invisibles’, obradoiros de empoderamento e un mercado de artesanía ‘Voces Delas’, completan a programación de este mes..
“ Rumorosas 2024” rende este ano homenaxe a María Calvo, Silvia Carnero, Lydia Angueira, Loli Quintáns, Sabela Ramos, Begoña Suárez, Ana Fernández e ao grupo de palistas formado por Ainara Rodríguez, Sabela Duro, María Villaverde, Uxía Álvarez e Candela Romero, todas veciñas de Padrón.
As homenaxeadas foron elixidas pola súa destacada actuación na defensa dos mesmos dereitos, os mesmos recursos, as mesmas oportunidades e a mesma protección entre mulleres e homes. A exposición de rúa inaugurarase o vindeiro venres, 8 de marzo, cun percorrido que partirá da praza da Igualdade ás 17.00 horas e percorrerá o casco histórico de Padrón dando a coñecer o labor das protagonistas.
Ás 18.00 representarase no auditorio municipal a obra de teatro Invisibles, protagonizada por Mela Casal, Neves Rodríguez e Sheyla Casal. O acceso é gratuíto ata completar aforo, pero é necesario retirar a entrada no centro social. O acto institucional do 8M celebrarase no auditorio municipal ao rematar a obra de teatro, sobre ás 19.30
Rumorosas 2024
As Rumorosas 2024 distinguidas polo Concello de Padrón este ano son:
María Calvo (Padrón, 1983. Llicenciada en Ciencias do Mar e CEO de Arenaria Coordinación, S.L.U., empresa fundada en 2009 con sede en Padrón dedicada á realización de actividades e proxectos educativos e divulgativos nos eidos científico, mariño e medio ambiental. Dende a súa experiencia persoal e profesional considera que o 8M “é o recordatorio de que a igualdade entre as persoas constrúese día a día”.
Silvia Carnero Ares (Santiago, 1983). Rexenta en Padrón o eco-salón de peiteado e de beleza Silvia’s Look. Debido a problemas de saúde derivados do uso de produtos químicos, especializouse en saúde capilar e dende 2016 traballa baixo parámetros do eco-salón, con tratamentos orgánicos de respecto polo medio natural. Comprometida coa igualdade de oportunidades, esta padronesa de adopción entende o 8M “como un día no que as mulleres celebramos os avances que se están acadando”.
Lydia Angueira (Dodro, 1954). Propietaria e cociñeira de Pulpería Rial, a casa de comidas inaugurada o 11 de febreiro de 1983 e convertida dende entón en todo un referente gastronómico e cultural da comarca. Dende a súa loita persoal contra o cancro, unha enfermidade arraigada na xenética familiar e que afecta a varias xeracións de mulleres, é exemplo de loita e positivismo. “O 8M é unha xornada especial pero é unha data que deberiamos ter en conta todo o ano poñendo en valor a todas e cada unha das mulleres cada un dos 365 días”, afirma Lydia.
Loli Quintáns (Negreira, 1958). É unha das pioneiras no Traballo Social en Galicia. No ano 1979 obtivo o título de Asistente Social e dende entón traballa vencellada a prol do servizos sociais básicos e comunitarios sendo testemuña e parte clave na implantación e desenvolvemento de moitos programas. Loli é referente na comarca do Sar e unhas das pioneiras a nivel galego na consolidación dos Servizos Sociais. Foi Traballadora Social en Padrón entre 1984 e 2021, período durante o que se implantaron o SAF, os programas básicos de Educación Familiar e Voluntariado, as Aulas de Formación Permanente de Adultos ou o CIM. A súa experiencia e vivencias lévanlle a sinalar o 8M como o día no que “conmemoramos as loitas e as conquistas sociais, laborais, políticas e culturais das mulleres, celebramos os logros acadados e reivindicamos a implementación de medidas para acadar a igualdade efectiva”.
Sabela Ramos (Padrón, 1986). Enxeñeira informática en Google DeepMind, en Amsterdam, actualmente traballa no desenvolvemento de ferramentas para Reinforcement Learning e a súa aplicación na IA xenerativa. Ten publicados máis de 30 artigos científicos e colabora en varios proxectos de software libre. Nos últimos 4 anos liderou a comunidade de Google Women in Engineering de Zurich e participa en distintas iniciativas para promover a igualdade. Comprometida de xeito activo para dar visibilidade ás mulleres nos diferentes eidos profesionais, entende que o 8M “é un día para reivindicar a igualdade e os dereitos das mulleres”. “E tamén para celebrar a sororidade e os logros das que viñeron antes e loitaron polos dereitos de todas”, engade.
Begoña Suárez (Santiago, 1972). Licenciada en Dereito, é dende o ano 2009 a directora-xerente da Asociación AMIPA, o único recurso de atención comarcal para as persoas con discapacidade intelectual e as súas familias, a Asociación de Nais e Pais de Persoas con Discapacidade Intelectual. Nesta entidade promove diferentes programadas de desenvolvemento sobre xénero e diversidade.
Begoña é consciente da problemática á que se enfrontan os colectivos máis vulnerables no seu día a día, por iso subliña que “o 8M é un día no que reivindicamos que hai que coidar e respectar os ritmos de cada muller para que poidamos ocupar o noso lugar no mundo”.
Ana Fernández (Estramundi, 1984). Iniciouse no folclore na Asociación Cultural Rosalía de Castro de Padrón, sendo agora a súa mestra e directora. Musicoterapeuta e educadora en Igualdade, promove a “folcterapia” nas asociacións de mulleres. Foi directora e actualmente é socia da Asociación Mulleres en Padrón e tamén forma parte da iniciativa de ‘Somos Pandereteiras’. Crítica coa situación da muller en moitos sectores profesionais, especialmente no eido artístico, Ana insiste en que o 8M “é unha data para lembrar e honrar ás que nos precederon na loita polos nosos dereitos e recordar que os cambios hai que pelexalos os 364 días restantes”.
Ainara Rodríguez – Sabela Duro – María Villaverde – Uxía Álvarez – Candela Romero, forman parte dunha das xeracións de deportistas máis brillantes. Todas elas destacan dentro do piragüismo, cunha emerxente traxectoria como palistas na que acumulan presencias nas mellores competicións a nivel nacional e internacional ademais de acadar diferentes títulos e medallas. Como mulleres mozas e como deportistas saben da dificultade de abrirse camiño e de facerse valer nun eido que ata fai pouco estaba só pensado para os homes. Aínda que cada unha amosa diferentes inquedanzas, coinciden en sinalar que o 8M “é un día no que as mulleres deberíamos estar unidas loitando polo nosos dereitos, porque ser muller é unha combinación de valentía, dignidade e resistencia inquebrantable”.
Obradoiros e mercado de artesanía Voces Delas
A ampla programación para celebrar o Día Internacional da Muller polo Concello de Padrón ocupará todo o mes. Mulleres visibles é un programa de actividades de sensibilización que levará a dinamizadora do CIM a todas as escolas unitarias e de educación infantil do municipio.
Onte martes comezou o primeiro dos obradoiros dirixidos á mulleres, Coidado emocional e empoderamento creativo, impartido por Reina D’Hore e que se vai desenvolverá os martes, 12, 19 de marzo e 2 de abril na aula do centro social de 18.15 a 20.15 horas. O obxectivo é fomentar o emmpoderamento e a xestión das emocións mediante o coaching persoal e de grupos con técnicas de creatividade como debuxo, escritura, barro ou movemento.
Os venres 15 e 22 de marzo e 12 e 19 de abril celebrarase o obradoiro Empoderamento dixital para mulleres, impartido por María Jesús Luces, na aula Cemit de 18.00 a 19.30 horas.
A asistencia a este dous obradoiros é gratuíta, pero require inscrición previa nas oficinas do CIM, no teléfono 611 003 472 ou no enderezo electrónico cim@padron.gal.
O 22 de marzo, ás 18.00 horas na Fundación Rosalía de Castro presentarase o libro A única, María Casares, de Anne Plantagenet. Todas as persoas asistentes poderán adquirir exemplares da obra e coñecer a figura da gran actriz galega. O acto será presentado pola concelleira de Muller e Igualdade, Mariló Saco, e pola actriz Berta Ojea, gañadora do Mestre Mateo 2023 por Rapa e editora da edición en galego do libro, que coñeceu persoalmente a María Casares.
A programación do 8M pecharase o sábado 23 de marzo coa celebración co mercado de artesanía Voces Delas, previsto para o pasado sábado, 2 de marzo, e que se adiou debido ao mal tempo. Postos de artesanía liderados por mulleres colocaranse no casco histórico de 11.00 a 19.00 horas, nun espazo no que haberá música en directo e diversas actividades durante todo o día.
