Bisbarra, 19 de agosto do 2024 – Padrón e Rois celebraran en conxunto o Día da Bicicleta 2024 homenaxeando a Blanco Villar, José Manuel Oliveira e José Ángel Vidal.
Este Día da Bicicleta tan particular terá lugar o vindeiro sábado día 24. O evento, organizado en colaboración coa Deputación da Coruña e o Club Ciclista Padronés, pretende ser unha festa do deporte aberta a persoas de todas as idades e niveis de experiencia.
En total percorreranse 15,5 quilómetros nunha ruta con saída e chegada no paseo do Espolón de Padrón e que contará cun avituallamento intermedio na praia fluvial de Seira, en Rois, onde os ciclistas poderán repoñer forzas antes de continuar a súa travesía.
A saída está programada para as 11:00 horas e todos os participantes recibirán agasallos. Ademais, ao finalizar o percorrido, sortearase unha bicicleta entre todos os asistentes, o que promete engadir un toque de emoción extra ao evento.
É importante lembrar que todos os menores de 11 anos deberán ir acompañados por un adulto, e que o uso do casco será obrigatorio para todos os participantes.
As inscricións realizaranse o mesmo día 24, entre as 9:45 e as 10:45 horas no punto de encontro do paseo do Espolón.
Esta xornada deportiva non só promove un estilo de vida saudable, senón que tamén serve para honrar o legado dos ciclistas que, co seu esforzo e dedicación, puxeron o nome de Padrón e de Rois no mapa do ciclismo nacional.
Este evento forma parte das actividades previas á undécima etapa da Vuelta Ciclista a España, que terá como punto de saída e chegada o Campus Tecnolóxico Cortizo o día 28 de agosto, un feito que subliña unha vez máis a tradición ciclista da comarca do Sar.
Para máis información sobre o evento, as persoas interesadas poden contactar co Centro Social de Padrón no teléfono 981 811 329 ou co Edificio Multiusos de Rois no teléfono 981 816 061.
