Bisbarra, 21 de novembro do 2022 – Os orzamentos da Xunta seguen sendo obxecto de emendas e agora os socialistas de Padrón son os que reclamarán unha residencia de maiores e reformas no centro de saúde da vila.
A parlamentaria Noa presentou as emendas xunto co secretario xeral e o portavoz do PSdeG local, Anxo Arca. Díaz alertou do “raquitismo orzamentario” ao que a Xunta condena ao Concello de Padrón nos Orzamentos para o próximo ano.
A parlamentaria engade que Padrón desapareceu “virtualmente” dos orzamentos da Xunta. Só quedan dúas actuacións de Augas de Galicia que foran paralizadas no 2009 e que se recuperan grazas aos fondos europeos.
Díaz reclama ademais un novo edificio para a escola de educación infantil de Estramundi, a que máis demanda de prazas ten no Concello, polo que pide “unha nova escola con novos espazos e capacidade suficiente para atender á demanda educativa” de Padrón. Os socialistas galegos incluirán entre as emendas aos Orzametnos a construción de novas instalacións polideportivas para o Concello, que “precisa de novas instalacións con máis oferta deportiva”.
A parlamentaria socialista pediu ademais a construción dunha nova biblioteca pública para o concello, xa que a actual “non está adaptada, o espazo é moi reducido e o mobiliario e os fondos resultan insuficientes”, e demanda un novo inmoble cunha capacidade mínima de 100 usuarios.
O Grupo Socialista reclama tamén un Plan de mobilidade sostible, que inclúa a construción de sendas fluviais para peóns e carril bici no entorno do río Sar, ademais da construción dun velódromo que dea saída á tradición ciclista da localidade. As emendas inclúen a instalación de dúas estacións de medición da calidade do aire, a extensión da rede de saneamento á parroquia de Carcacía e do núcleo da Escravitude e a substitución das canalizacións de auga potable.
