Bisbarra, 26 de decembro do 2022 – O partido Socialista levou ao Parlamento de Galicia unha iniciativa que reclama da Xunta a construción dunha nova escola de educación infantil para o lugar de Extramundi en Padrón.
A portavoz de Educación do Grupo Socialista, Noa Díaz, lamenta que “o PP teña rexeitado tanto esta infraestrutura como as obras de mantemento necesarias para garantir unhas condicións dignas para os nenos e nenas da Escola de Estramundi de Arriba”. Díaz asegura ademais que “da a impresión que a intención é pechar a escola”.
Díaz solicitara que mentres non se dera construído unha nova escola, a lo menos o goberno galego asumira o cambio da cuberta, unha obra estrutural que é competencia do goberno galego. Lembra que a propia comunidade educativa se ten dirixido ao Concello para denunciar tamén o estado “deplorable” das fachadas, con “gretas, desatascados, buratos e fungos”.
Noa Díaz sinalou que “ben o Concello de Padrón ou ben a Xunta de Galicia deberan garantir que os nenos e nenas de Estramundi asistan ás súas clases en condicións dignas dunha educación pública de calidade”. Lembra que a Xunta si que está a acometer obras como estas noutros centros educativos, e reclamou que inclúan á escola de Padrón no seu Plan de Nova Arquitectura Pedagóxica “cuxas previsións descoñecemos, tal e como quedou hoxe claro”. Advirte ademais de que o “lamentable estado” da escola funciona como elemento disuasorio para ampliar a matrícula”.
Esta escola é nestes momentos a de maior demanda de prazas do Concello, con previsión de aumentar nos próximos anos pola chegada de segundos e terceiros irmáns e irmás do alumnado actual, ademais de que por cuestións de conciliación tamén é o recurso educativo máis axeitado para a plantilla da sede central da empresa Cortizo.
