Padrón, 30 de maio do 2022 – Padrón aprobou en pleno o orzamento municipal para o presenta exercicio que se achega aos 9,5 millóns de euros e que destinan a investimentos preto de 1,2 millóns.
Segundo o goberno municipal o obxectivo de este orzamento é “ser parte activa e dinamizadora da economía, xerando emprego para activar a demanda e o consumo”.
O alcalde, Antonio Fernández, destacou o forte incremento da partida destinada a asistencia a persoas dependentes e familias desfavorecidas, que pasa de 340.000 a 480.000 euros, incrementándose un corenta por certo.
Na partida de investimentos, o alcalde resaltou as obras de pavimentación e canalización de pluviais no polígono da Picaraña ou o acondicionamento interior da antiga casa Azucarera para trasladar aí a Escola municipal de Música, xunto co asfaltado e os arranxos de vías nas diferentes parroquias do municipio. O goberno local tamén continuará a renovar o alumeado público en diferentes parroquias para contribuír ao aforro enerxético e diminuír a contaminación.
O goberno local contempla seguir dotando con novos vehículos ao servizo de recollida de lixo e tamén inclúe partidas na área de turismo para a promoción do Xacobeo 2022.
Segundo anunciou o alcalde, nos próximos días vai comezar a obra de ampliación do saneamento en Herbón, Pazos, Aduana, Paraíso e Palomar, cun investimento que supera o millón cen mil euros.
Críticas do BNG
Bea Rei, Concelleira do BNG, criticou duramente un orzamento “de corta e pega que non presentan solución a ningún problema do Concello, pero que tampouco reflexan nin investimento nin proxecto de futuro”.
A Concelleira fixo mención á situación de perda adquisitiva dos traballadores “que teñen que buscar solucións nas sentencias xudiciais e cunha RPT que segue sen implantarse”. Tamén recordou o recurso do recoñecemento extraxudicial de crédito “tan vixente para este Goberno e a inexistencia das licitacións adiadas ano tras ano”.
O voceiro socialista, Camilo Forján, tamén incidiu na necesidade de licitar os servizos e criticou a falta de interés do goberno municipal en que a oposición participase na elaboración do orzamento. Tanto BNG como Psoe votaronfinalmente en contra das contas, mentres que Compromiso abstívose.
