Bisbarra, 5 de marzo do 2025 – O concello de Padrón ven de renomear a área recreativa na que conflúen o Sar e o Ulla como Paseo da Constitución.
Segundo o decreto asinado polo alcalde, Anxo Arca, esta decisión busca poñer en valor o legado da Constitución de 1978 e “transmitir ás futuras xeracións a importancia de defender os valores democráticos e de convivencia que esta representa”.
Desde o goberno municipal explícase que o “Paseo da Constitución converterase nun espazo de reflexión sobre a historia democrática recente e a importancia do diálogo e o consenso como elementos clave da convivencia”.
Ademais de mudar o nome, a zona contará cunha bandeira constitucional xunto a un libro pétreo gravado co preámbulo da Carta Magna, onde se recollen principios fundamentais como a convivencia democrática, a protección dos dereitos humanos e a promoción dunha sociedade máis xusta e inclusiva.
Tal e como recolle o decreto “a Constitución Española de 1978 supuxo un avance determinante na configuración do noso Estado tal e como hoxe o coñecemos”. O documento lembra que a aprobación deste texto legal consolidou os principios da soberanía nacional, o respecto aos dereitos e liberdades individuais, a igualdade ante a lei e o recoñecemento da diversidade cultural e territorial de España.
A nova denominación do paseo “reflicte o compromiso do Concello de Padrón cos valores democráticos e coas institucións que fixeron posible o progreso do país”.
O cambio de nome afecta ao tramo comprendido entre a última ponte sobre o río Sar ata a intersección co vial de Paraíso, A Ponte, seguindo a beira do litoral. Parte deste espazo foi acondicionado no marco do Proxecto de recuperación da servidume de tránsito no T.M de Padrón da Demarcación de Costas en Galicia.
