O goberno socialista, en minoría, de Padrón, vinculará a unha moción de confianza a aprobación dos orzamentos 2025 ao igual que fixo o de Dodro.
Mentres Compostela celebraba o día grande da Ascensión o concello de Padrón debatía en pleno os orzamentos municipais. Un presuposto que finalmente foi rexeitado pola oposición e que será vinculado a unha cuestión de confianza tal como avanzou o alcalde Anxo Arca.
O pleno pódese ver integro en YouTube na canle do BNG xa que non se grava de xeito oficial. Previamente o equipo de goberno socialista enviará copia dos orzamentos o Bloque pero os nacionalistas votaron en contra pola falta de concreción do documento.
O debate sobre o orzamento non se prolongou xa que o alcalde, Anxo Arca, axustouse aos tempos previstos no regulamento sen deixar moita marxe. O BNG recriminou ao goberno municipal que o orzamento resolva moitas partidas coa frase “otras inversiones nuevas vinculadas al funcionamiento operativo”.
Os nacionalistas concretaron na segunda quenda a súa principal queixa: comprenden que haxa que deixar partidas para o que poda xurdir pero non pode ser todo. Lembraron ademais que se contrataba en exceso a empresas privadas e que en dous anos non se sacara ningunha licitación.
O interventor interveu para aclarar que o feito de non se concretaran as partidas non era ilegal xa que estaban vinculadas a unha programación. Puxo como exemplo que estaban vinculadas a servizos sociais, ou a protección civil, alcantarillado… e polo tanto estaban dentro da legalidade.
O Partido Popular pola súa banda falou da parte económica e lembrou que este era o orzamento máis caro da historia e que só en persoal e gasto corrente sube un millón de euros. Na segunda quenda engadiu que os impostos directos e indirectos subían un 8% e os ingresos por taxas e prezos públicos un 12%, subas que pagará a veciñanza.
O alcalde, Anxo Arca, recriminoulle ao BNG que non presentaran propostas para o orzamento cando eles, o Psoe, enviaranlle o proxecto de orzamentos elixíndoos como socios preferentes. Sobre a falta de licitacións Arca lembrou que levaban só dous anos “o PP levaba 12 e tampouco fixeran ningunha” dixo.
Antes da votación o alcalde xa anticipou que o orzamento tería que ir vinculado a unha moción de confianza. Queda por saber cando se convocará ese pleno no que podería abrirse a posibilidade dunha moción de censura que, en todo caso, non parece probable.
