Un investimento de nove millóns de euros para conseguir dar servizo a unha poboación de 90.000 persoas
Ánxeles Vázquez, conselleira de Medio Ambiente e Cambio Climático, visitou as obras de ampliación da estación de tratamento de auga potable de Padrón. A responsable avanzou que a Xunta conta con rematar a mellora da depuradora nun ano. Uns traballos que beneficiarán a toda a marxe dereita da ría de Arousa.
As obras comezaron o pasado mes de setembro e, ao seu remate, permitirán incrementar a capacidade actual de tratamento de auga da depuradora nun 40 %, ata acadar os 610 litros por segundo.
Durante a visita Ángeles Vázquez destacou a transcendencia desta actuación non só para a veciñanza de Padrón senón para a do resto de municipios da contorna para os que foi concibida: Dodro, Catoira, Valga, Ribeira, Pontecesures, Boiro, A Pobra do Caramiñal, Rianxo e Vilagarcía de Arousa.
A responsable autonómica explicou que a execución da ampliación da depuradora se enmarca no convenio de colaboración subscrito en decembro do ano 2022 entre o organismo hidráulico e o Concello de Padrón e suporá un investimento de arredor de 9 millóns de euros, entre custos da obra e dos servizos asociados, que achegará integramente o Executivo galego.
A depuradora de Padrón, localizada preto do núcleo de Casal, nas proximidades do río Ulla, está operativa desde o ano 1996 polo que resultaba necesario acometer a súa ampliación. Os terreos requiridos para as obras foron adquiridos pola Mancomunidade do Monte Veciñal Lapido, á que Ángeles Vázquez agradeceu a súa colaboración.
O obxectivo da actuación é ampliar a capacidade de tratamento actual da estación para pasar dos 450 litros por segundo que ten hoxe ata os 610 l/s, é dicir, un incremento do 40 % que beneficiará a 10 concellos da ría de Arousa, que suman case 90.000 habitantes equivalentes.
Ademais, aproveitarase a obra para dotar á infraestrutura dun sistema para a recuperación do auga de lavado de filtros, así como dun tratamento de lodos, dun sistema de control que integre tanto os equipos existentes como os da ampliación e un circuíto de vídeo vixilancia.
Tamén se actuará sobre a rede de distribución con reparacións estruturais nos depósitos de cabeceira do Casal, aos que se dotará así mesmo dun instrumento para medir o caudal de saída en continuo, así como dun sistema de medición da calidade da auga nos puntos de entrega en alta
