Bisbarra, 10 de decembro do 2024 – O concello de Padrón ven de rematar as obras de melloras na área recreativa na que desembocan os ríos Sar e Ulla.
Os traballos no remate do Sar e o Ulla foi converteron o lugar nun punto de referencia para o lecer, o turismo e a posta en valor do patrimonio local. As actuacións realizadas incluíron a eliminación de elementos en mal estado como barandillas, fontes e equipamentos do antigo parque infantil; a recuperación das sendas e a eliminación de herbáceas para facilitar o acceso e mellorar a seguridade e a plantación de árbores autóctonas.
Colocáronse ademais novas fontes, incluíndo unha adaptada para cans, e instalouse novo mobiliario urbano dende bancos de pedra a barandillas renovadas. O plan de mellora tamén incluíu a creación dun parque infantil para maiores de 6 anos, fabricado con materiais reciclados, así como a construción dun pequeno auditorio de pedra, deseñado para eventos de pequeno formato onde se pode observar o solpor.
Esta área padronesa conta así mesmo cunha nova estrutura decorativa en forma de dorna, que lembra as embarcacións tradicionais empregadas na pesca na zona. Esta estrutura, co lema Díxolle a lamprea ao salmón: ti vas río arriba ou quedas en Padrón?, está pensada como un atractivo turístico e un espazo para fotografarse coas vistas da confluencia dos ríos Sar e Ulla.
Financiamento europeo
O proxecto levaba por título “Embelecemento do litoral na área recreativa da desembocadura” e recibiu un investimento de 60.080,54 euros. Trátase dunha área recreativa na zona na que rematan o seu percorridos os ríos Sar e Ulla.
O financiamento forma parte, nun 90%, das axudas para actuacións de embelecemento do litoral galego incluídas no Plan de recuperación, transformación e resiliencia, financiado pola Unión Europea cos fondos NextGenerationEU. O dez por cento restante cubriuse con fondos municipais.
A concelleira de Turismo, Chus Campos, destacou a importancia deste proxecto que amosa “o compromiso do goberno municipal co patrimonio natural e cultural de Padrón”. “O obxectivo destas actuacións foi embelecer esta zona tan emblemática, ao tempo que creamos un espazo versátil que poida ser aproveitado tanto para o lecer como para actividades culturais e turísticas. Co novo auditorio ou o parque infantil, queremos que esta área sexa desfrutada por persoas de todas as idades”.
