Bisbarra, 19 de setembro do 2023 – O concello de Padrón declarou o día de hoxe loito oficial polo pasamento do locutor Pepe Domingo Castaño.
O alcalde da vila, Anxo Arca, asinou un decreto tralo acordo unánime adoptado polas tres forzas políticas da Corporación tras a celebración dun pleno, que comezou cun minuto de silencio. O acordo fíxose visible de inmediato coas bandeiras dos edificios públicos municipais ondeando a media hasta.
Pepe Domingo Castaño morreu en Madrid na madrugada deste domingo 17 de setembro aos 80 anos de idade. O célebre xornalista, que naceu en Lestrobe (Dodro) o 8 de outubro de 1942, trasladouse aos poucos días coa súa familia a vivir á zona vella de Padrón.
Castaño Solar tivo unha longa traxectoria profesional no mundo audiovisual como presentador de radio e televisión, cantante e escritor. Entre os premios acadados ao longo da súa carreira están 4 premios “Ondas”. Recibindo tamén el “Premio Nacional a las Artes y las Ciencias aplicadas al deporte” e o “Premio Joaquín Prat de Radio” outorgado pola Academia Española de la Radio.
Como escritor publicaba no 2006 “Carrusel deportivo. Diario de un año”, no 2008 “Debajo de la parra” e o ano pasado un premonitorio “hasta que se me acaben las palabras”.
O decreto da Alcaldía recolle que Pepe Domingo Castaño nunca deixou de estar fortemente ligado a Padrón, onde reside gran parte da súa familia, sendo un grande embaixador da vila e dos seus recursos culturais, naturais, literarios e gastronómicos, aos que facía referencia publicamente sempre que tiña ocasión.
Era habitual velo nas festas de Pascua ou no Santiaguiño, acompañado en moitas ocasións de persoeiros e artistas de nivel nacional así como os seus compañeiros da radio.
O alcalde, Anxo Arca, trasladoulle á familia de Pepe Domingo Castaño as condolencias en nome de toda a veciñanza de Padrón.
