Bisbarra, 27 de marzo do 2023 – O concello de Padrón atópase desde hoxe luns cunha folga de lixo e cun conflito laboral na policía local tras unha denuncia de Comisións Obreiras.
En ambos os dous casos os sindicatos, CIG no caso do lixo e CCOO no da policía, dirixen as críticas ao goberno municipal de Padrón pola falta de interese na procura de solucións. CIG advirte que por esa causa a folga preséntase longa. CCOO acusa ao executivo local de querer desmantelar o servizo.
Unha folga de lixo ás portas da Pascua
O do lixo en Padrón é un conflito que nace no ano 2015, data de sinatura do último convenio dos traballadores de ese centro de traballo. Por aquel entón o servizo de lixo estaba en precario e a empresa que o xestionaba renovaba contratos mes a mes e por esa razón non negociaba un novo convenio.
A situación mantívose no tempo durante oito anos ata que en xullo pasado asumiu o servizo FCC Medio Ambiente. O comité de empresa comezou as negociacións coa nova empresa pero a nova concesionaria di no ter marxe de suba salarial coa oferta económica coa que gañaron a concesión.
Os traballadores do lixo de Padrón lembran que levan sen actualizar o soldo oito anos. Que no 2021 o IPC foi un 6,5 e no 2022 dun 5,7. Fronte a este incremento de prezos a concesionaria só oferta unha suba dun 5% para os vindeiros catro anos.
A última reunión coa empresa foi en decembro. A folga foi convocada hai dez días e desde o sindicato solicitouse ao concello unha reunión, na que estivera tamén a empresa, sen recibir resposta. O mércores pasado emitíase un decreto de alcaldía con servizos mínimos do 75%, e do 100% en algúns casos, que vai ser recorrido pola CIG.
O Comité avanza que o conflito será longo polo nulo interese do goberno de Padrón en solucionalo. Veñen ademais de convocar unha concentración, diante do concello, o vindeiro xoves as sete e media da tarde, media hora antes do pleno municipal.
Desmantelar a policía local
Comisións Obreiras ven de abrir un conflito laboral co concello de Padrón ao presentar unha denuncia por “abuso de contratación de auxiliares” e acusa ao goberno municipal de querer desmantelar o servizo.
A Relación de Postos do Traballo de Padrón, aprobada no 2021, contempla 11 prazas de axentes. O sindicato explica que esta foi a primeira infracción xa que esa cantidade incumpre a normativa autonómica que marca unha media de 1.8 policía por cada 1.000 habitantes polo que a RPT debería ter polo menos 15 prazas contempladas.
Na actualidade só hai seis prazas cubertas polo que o concello conta con tres veces menos efectivos dos marcados pola normativa autonómica. CCOO denuncia ademais que nas últimas convocatoria públicas de emprego ofertáronse catro prazas pero non se chegou a convocar ningunha.
Ante esta situación o sindicato explica que “Esta situación fainos pensar que a contratación de Policías Locais non é prioritaria para o Concello de Padrón e que imos cara a un desmantelamento progresivo do corpo”. A denuncia prodúcese porque segundo CCOO o goberno municipal intenta ocultar a situación “contratando auxiliares e asignándolle funcións que non lles corresponden”.
