Bisbarra, 12 de agosto do 2024 – A Mesa Xeral de Negociación do Concello de Padrón aprobou a modificación dos procesos de estabilización de emprego temporal para dar cobertura ás prazas que non estaban incluídas na oferta de emprego público extraordinario do 2022.
A oferta anterior deixaba fóra ao persoal de servizos tan importantes como o CIM e o GES, ao non situalos o anterior goberno dentro do cadro de persoal municipal. Pola contra, o actual equipo de goberno, liderado por Anxo Arca, considera estes servizos fundamentais para Padrón.
Esta medida foi consensuada cos sindicatos e co comité de empresa na mesa xeral de negociación, seguindo a liña de diálogo prometida polo actual goberno local. O resultado deste proceso será a eliminación da temporalidade dos empregados públicos do Concello, cumprindo así co compromiso electoral do actual grupo de goberno socialista.
A selección de persoal funcionario de carreira e de persoal laboral fixo levarase a cabo mediante o sistema de concurso e ofertaranse 21 prazas en total, que se suman ás 42 prazas incluídas inicialmente.
Os procedementos convocados inclúen os 8 postos de peón e 4 xefes/as de equipo do Grupo de Emerxencias Supramunicipal; 2 limpadores/as e 1 conserxe do albergue de peregrinos; 1 psicólogo/a do Centro de Información á Muller e apoio aos servizos sociais; 1 posto de dirección e asesoría xurídica do Centro de Información á Muller e apoio aos servizos sociais; 1 técnico/a informática responsable da aula de informática e do Centro de Modernización e Inclusión Tecnolóxica (CEMIT); 1 auxiliar de enfermería do centro de saúde; 1 limpador/a do centro de saúde; e 1 operario/a limpeza viaria.
Esta convocatoria servirá tamén para crear unha bolsa de emprego para a cobertura de postos de traballo con carácter interino ou temporal integrada por todas aquelas persoas aspirantes que non superasen o proceso. Grazas á creación destas bolsas poderanse cubrir as baixas con máis celeridade e diminuír tempos de espera nos diferentes departamentos e servizos.
