Bisbarra, 5 de maio do 2023 – Comisións Obreiras interporá un recurso contencioso administrativo para que o concello de Padrón actualice as nóminas dos traballadores conforma á Relación de Postos de Traballo, RPT.
A RPT de Padrón foi aprobada hai máis de dous anos sen que as soldos recollidos nela foran actualizados. O recurso preséntase tras unha solicitude ao concello para que actualizara as nóminas e pagara os atrasos e que non foi atendida.
Desde o sindicato “lamentan que o Concello de Padrón nin sequera respondese o escrito presentado polo delegado ou que declinase as peticións do sindicato para manter unha xuntanza e propiciar unha solución”. Tamén critican que o goberno local “se empreñe en xudicializar as relacións laborais”.
O sindicato CCOO fai referencia a unha recente sentenza xudicial que condea ao concello de Padrón a “levar a cabo os actos necesarios» para incluír na oferta de emprego público (OEP) unha serie de prazas que o Concello decidira unilateralmente non incluír”.
A sentenza chegou tras as tentativas infrutuosas do sindicato por negociar co Concello unha solución, e malia ás “numerosas advertencias» realizadas durante a negociación da RPT”. O sindicato tamén informa de que o Concello de Padrón aínda non ten publicadas as convocatorias dos procesos selectivos de estabilización derivados da Lei 20/2021, de 28 de decembro, de medidas urxentes para a redución da temporalidade no emprego público, malia que o prazo rematou o pasado 31 de decembro.
CCOO contrapón este desleixo coa “celeridade” con que o Concello tramita as compatibilidades dos membros do goberno para poderen traballar fóra da institución ou a suba salarial de 500 euros mensuais que aplicaron a cada edil con dedicación parcial no primeiro pleno tras as últimas eleccións.
