Bisbarra, 30 de outubro do 2023 – O BNG de Padrón sacou adiante no pleno ordinario do concello unha moción en defensa do Castro Valente e contra a ameaza dos eólicos.
Unha moción que insta á Xunta a que denegue a solicitude de Declaración de Utilidade Pública ao proxecto presentado por Iberdrola Renovables, que afecta ao Castro Valente, coa presentación de alegacións dende o Concello.
A aprobación da moción do BNG no pleno do pasado xoves implica que se presenten alegacións dende o Concello para a defensa de este enclave patrimonial tan esquecido. A voceira nacionalista, Beatriz Rei, manifesta que “a defensa do Patrimonio debe estar por riba dos intereses dunhas poucas empresas, e a destrución de Castro Valente é o suficientemente grave como para non cesar na súa defensa. Logramos que o Concello presente, esta vez si, alegacións a esta barbarie”.
O BNG de Padrón prepara ademais outra serie de alegacións que colgará nas súas redes. A intención é que calquera persoa que así o considere, as poida presentar de maneira individual, coa intención de conseguir as máximas posíbeis.
Rei lembraba que “o prazo remata o vindeiro 18 de novembro, polo que animo dende aquí a toda a cidadanía a que presente a súa propia ou, canda menos, a que preparará o BNG Padrón”. O BNG está tamén a traballar para que se retomen os labores de escavación, estudio e difusión de Castro Valente en colaboración coa USC e a Deputación de A Coruña.
25N e maltrato animal
O BNG presentou tamén en este pleno unha moción co gallo do 25N para demandar da Xunta de Galiza máis investimento, colaboración e impulso do CIM para avanzar de maneira eficaz na loita contra a violencia machista.
Tras a aprobación de dúas emendas presentadas pola Concelleira, Bea Rei, aprobouse tamén unha moción para a Declaración de Padrón Pobo Libre de Maltrato Animal.
