Bisbarra, 15 de novembro do 2022 – O BNG presentará emendas aos orzamentos do estado relacionadas coa seguridade viaria Nacional 550.
A concelleira nacionalista en Padrón, Beatriz Rei, reuniuse co Deputado do BNG Nestor Rego para estudar os proxectos para o concello que defenderá nas emendas aos Orzamentos do Estado.
Néstor Rego comprometeuse a esixir a urxente mellora da N-550 ao seu paso polo municipio e a actuación nas ramplas do peirao da Ponte entre outras iniciativas. Rego explicou que “Non é asumible que se ignoren as necesidades do Concello de Padrón, mais tamén é imperdoable que ano tras ano, o equipo de goberno non faga reclamacións e esixa partidas específicas nos orzamentos para poder levar a cabo as inversións que o concello precisa con urxencia”.
O BNG defenderá no Congreso a humanización da N-550. O proxecto contempla a mellora da vía en varios tramos, en primeiro lugar, no que transcorre entre a a Colexiata de Iria e o núcleo de Padrón. Neste tramo, a estrada actúa de barreira divisoria entre os dous lados e separa mais que une a Iria e a Padrón polo que é preciso realizar actuacións que melloren a comunicación peonil da vía e integrar esta no tecido urbano. A iniciativa contempla tamén a mellora do tramo entre Padrón e a Ponte no que se aposta por mellorar a seguridade xa que neste momento carece de beirarrúas a pesar de existir xa un proxecto previo desde o ano 2009.
Finalmente, entre a Escravitude e Pazos recóllese a urxente humanización e protección da zona do Santuario e a accesibilidade en todo o tramo.
Na xuntanza, o deputado Néstor Rego comprometeuse tamén a esixir nas emendas aos orzamentos a actuación sobre as ramplas do peirao da Ponte que, segundo destacou a concelleira Beatriz Rei, supón “unha emenda que se podería catalogar de histórica, xa que dende a súa construción, non volveron a investir nin un céntimo para o seu mantemento”.
Circunvalar a N-550
A concelleira nacionalista de Padrón informou tamén ao deputado Néstor Rego da importancia da emenda que reclama a circunvalación da N-550 para bordear o espazo da Colexiata de Iria – Casa dos Coengos. O proxecto ten aínda máis relevancia ao se tratar dunha zona declarada BIC na que se atopa a sede da Fundación Cela e que constitúe un dos espazos de maior valor patrimonial do concello na actualidade absolutamente desvalorizado pola intensidade do tráfico.
Ademais, as emendas do BNG recollen tamén a petición de actuación no coñecido como “Paso das Ovellas” coa colocación dun semáforo que actúe como medida de seguridade ante o paso continuado de persoas que cruzan a vía diariamente, intensificado en determinadas épocas ao formar parte do trazado do camiño Portugués. Con anterioridade tratábase do antigo paso de cruce, mais foi pechado co cal a opción de paso actual pasa pola N-550, unha alternativa altamente perigosa.
“As emendas presentadas hoxe suporán unha mellora importante para este Concello de seren aprobadas. Desde o BNG defenderémolas con firmeza porque, entre outras cousas, refírense á seguridade das persoas e son actuacións que non poden demorar máis. Padrón necesita poñer en marcha estes proxectos tanto para as veciñas e veciños como para as persoas que visitan este concello atraídas polos seus importantes recursos culturais e turísticos”, concluíu Néstor Rego.