Padrón, 13/06/2026 – Os problemas de abastecemento de auga de lugares como Prada, A Picaraña ou Areal, na parroquia de Cruces, comezan a ter solución. O Concello de Padrón realizou unha intervención de urxencia en Tarrío (Pazos) instalando unha estación de bombeo de aceleración destinada a evitar caídas de presión na zona norte da rede municipal de abastecemento.
Estes lugares de Cruces viñan padecendo situacións de baixa presión ou desabastecemento recorrente especialmente nas épocas de estiaxe, cando aumenta considerablemente o consumo de auga na rede en horas punta.
Esta nova estación de bombeo está totalmente automatizada e telexestionada, programada para entrar en funcionamento en canto detecta baixadas de presión polo incremento do consumo, mantendo así unha presión constante. Conta con catro bombas de aceleración, tres delas para o funcionamento habitual e unha a maiores de reserva que entrará en funcionamento en caso de avaría dalgunha das habituais.
Deste xeito o Concello pon fin ás dificultades que historicamente viña padecendo a veciñanza destes lugares, a maioría na parroquia de Cruces, que se vía obrigada a buscar alternativas para realizar as tarefas máis cotiás, como lavar a roupa ou ducharse.
O alcalde, Anxo Arca, manifesta a súa satisfacción por ter resolto esta problemática, xa que “toda a cidadanía merece ter garantidos os servizos básicos. Dende o Concello traballamos nese sentido, mellorando a rede de abastecemento e tamén a de saneamento para estendela a todos os núcleos e que preste o mellor servizo”.
Arca engade que “A veciñanza de varios puntos da parroquia de Cruces pasouno realmente mal durante moito tempo vendo a súa vida condicionada pola falta de auga. Era unha situación que debía terse solucionado hai tempo. Alégrame que por fin poidan vivir tranquilos. Este é un bo exemplo de que dende o Concello traballamos para mellorar a calidade de vida da cidadanía”.
Varias intervencións máis de urxencia
O Concello de Padrón vén de realizar varias intervencións de urxencia co fin de mellorar as súas redes de abastecemento e de saneamento. A esta actuación de abastecemento en Tarrío, súmase a mellora do servizo na Rúa Nova e na Rúa Pérsico (aínda en execución), ou en Cortiñas. Actuacións encamiñadas a mellorar a rede solucionando problemas recorrentes e coñecidos que ata agora non se tiñan afrontado coa suficiente dilixencia.
O alcalde agradece a colaboración e a sempre boa intención da empresa Espina & Delfín, “que en todo momento arrima o ombreiro para que Padrón mellore estes servizos”.
