Bisbarra, 18 de marzo do 2024 – Pablo Lago, alcalde de Brión e presidente da Mancomunidade de Municipios Serra do Barbanza, visitou a planta de reciclaxe de Servia, Lousame, invitado polo comité de empresa e a empresa FCC.
Lago Sanmartín foi recibido por Luís Fernández, xefe da planta de reciclaxe que xestiona FCC, e por Ángel Brantuas, presidente do comité de empresa, quen estivo acompañado por varios membros do mesmo.
Fernández guiou á comitiva polas instalacións da planta de tratamento de lixo, onde puideron comprobar o seu funcionamento, o estado da flota e da maquinaria e a zona de vertedoiro entre outros departamentos. Pablo Lago dixo que “Queriamos ver sobre o terreo o funcionamento da planta e comprobar tamén o estado no que se atopan tato as instalacións como a flota de vehículos”.
Mesa de traballo
O presidente da Mancomunidade explicou que o pasado 7 de marzo tivo lugar en Brión a primeira mesa de traballo despois das eleccións autonómicas na que participaron os alcaldes e alcaldesas dos municipios que levan os seus refugallos á planta de reciclaxe de Servia.
Nese encontro analizáronse xa algúns dos asuntos expostos dende o comité de empresa e por FCC como o plan de pagos, a compra de novos contedores ou a reparación da maquinaria. Pablo Lago deu conta tamén das reunións de traballo mantidas con Sogama, Ecoembes e coa Xunta de Galicia para tratar cuestións de importancia para o futuro da planta. Encontros que continúan producíndose, como o celebrado a pasada semana coa directora xeral de Calidade Ambiental, Sostibilidade e Cambio Climático, Sagrario Pérez Castellanos.
Unha vez finalicen as mesas de traballo cos alcaldes e alcaldesas, Pablo Lago convocará unha Xunta Xeral de Concellos da Mancomunidade Serra do Barbanza, atendendo así a petición realizada pola maior parte dos seus integrantes, así como unha Asemblea Xeral, para tomar as decisións precisas para garantir o futuro da planta de tratamento de lixo de Servia.
