Compostela, 06/06/2026 – O Ateneo de Santiago celebrará este luns, ás 19.30 horas, na rúa do Vilar, 19, a conferencia «Reivindicando a Valentín Lamas Carvajal, no 150 aniversario d’O Tío Marcos da Portela», impartida por Afonso Vázquez-Monxardín, catedrático de Lingua e Literatura Galegas e académico correspondente da Real Academia Galega.
A actividade enmárcase na conmemoración do 120 aniversario do falecemento de Valentín Lamas Carvajal, unha das figuras máis destacadas do Rexurdimento galego. A conferencia achegarase á traxectoria literaria, xornalística e cultural de Lamas Carvajal, autor fundamental para comprender a recuperación da lingua galega na segunda metade do século XIX.
O encontro coincidirá tamén coa celebración dos 150 anos da publicación do primeiro número d’O Tío Marcos da Portela, considerado o primeiro gran xornal monolingüe en galego e unha das iniciativas editoriais máis influentes da época. A través desta revisión, abordarase a vixencia do seu legado e a relevancia da súa contribución á cultura galega contemporánea.
O relator, Afonso Vázquez-Monxardín (Ourense, 1960), desenvolveu unha ampla traxectoria nos ámbitos da historia, a literatura e a divulgación cultural. Catedrático de Lingua e Literatura Galegas, colaborador habitual na prensa e comisario de diversas exposicións, dedicou nos últimos anos unha atención especial á figura de Lamas Carvajal.
Entre outras iniciativas, promoveu a recuperación da obra El Cancionario del Miño, elaborou para o Consello da Cultura Galega a entrada «Valentín Lamas Carvajal, o cuarto pé do rexurdimento» e participou na organización dos actos conmemorativos polo 150 aniversario da saída á rúa d’O Tío Marcos da Portela.
