Teo, 24 de febreiro do 2022 – O orzamento de Teo volverá a pleno o próximo martes, despois de que o fixera este mércores, vinculado a unha moción de confianza.
O orzamento presentado por Son de Teo non acadou os apoios necesarios pese a ter só a oposición do Partido Popular. O BNG mudou o seu voto no último momento e decidiu apoiar o proxecto mentres que o Psoe abstívose.
Un orzamento inevitable
O proxecto de orzamento presentado polo equipo de goberno de Son de Teo é, según o alcalde Rafa Sisto o “único posible”. Uns ingresos moi axustados ás partidas garantidas, excepto a venda de parcelas que volve un ano máis a ser o centro do debate, e uns gastos inevitables e que poden crecer se a enerxía segue a subir de prezo. Rafa Sisto explica porque os consideraba como única vía
Psoe e BNG dixeron comprender os orzamentos pero se mostraron críticos cos ingresos que consideran que poden non conseguirse. Mentres que o BNG no último momento decidiu mudar o voto e apoiar as contas o Psoe mantívose na abstención propiciando o rexeitamento do orzamento xa que é preciso unha maioriía cualificada.
O PP criticou os orzamentos considerando que os gastos están inflados e votou en contra.
Rafa Ssisto levará a un pleno extraordinario os orzamentos vinculados a unha cuestión de confianza polo que, se non sucede nada imprevisto quedarán finalmente aprobados.
O alcalde tamén deixou entrever que este orzamento será o último do mandato e que serán outros os que teñan que deseñar o próximo.
Outros temas
O pleno comezou coa toma de posesión de Patricia Castela Ferreiro como concelleira da corporación municipal e voceira do BNG tras a renuncia de Manuel Barreiro.
A continuación saíu adiante por unanimidade a modificación do uso dunha parcela en Parque Montouto para que poida ser destinada a uso dotacional.
Aprobouse un recoñecemento extraxudicial de crédito cos votos a favor do equipo de goberno, BNG e PP e a abstención do Psoe.
O ditame da proposta da alcaldía de modificación da ordenanza fiscal reguladora do imposto sobre o incremento de valor dos terreos de natureza urbana, a coñecida como plusvalía, aprobouse co voto a favor do BNG e do Psoe que pasou, no último momento, de abstención a apoiar a modificación para que puidera saír adiante . O alcalde criticou o voto contrario do PP dicíndolles “¿como va a votar en contra dunha lei que sacaron vostedes?”.
Moción
No apartado de mocións aprobouse por unanimidade a presentada polo BNG de apoio ás mobilizacións feministas do 8 de marzo e demanda dos compromisos pendentes.