O ciclo leva por título “Xeiras. Tres camiños de auga e terra” e inclúese no Encontro de Verán 2025. A orquestra e Coro actuará do 25 ao 27.
Compostela acollerá por primeira vez tres concertos conxuntos da Orquestra e Coro da Universidade, no marco do Encontro de Verán 2025. Serán os días 25, 26 e 27 de xullo, baixo o título “Xeiras. Tres camiños de auga e terra”
A Orquestra e Coro da USC propón unha pequena xira musical por lugares emblemáticos da cidade: a Igrexa da USC, a Casa das Máquinas e a Igrexa da Nosa Señora da Mercede de Conxo.
Trátase dunha proposta artística inédita que procura levar a música á cidadanía desde diferentes barrios, permitindo que cada zona da cidade poida achegarse tanto ao repertorio como ao proxecto que representa a Orquestra e Coro da USC.
O ciclo coincide coas datas centrais das festas do Apóstolo, ofrecendo unha alternativa cultural de calidade, aberta e de balde para todos os públicos. Na iniciativa colaboran o Concello de Santiago de Compostela e a Parroquia da Nosa Señora da Merced de Conxo.
Unha viaxe entre auga e terra: programa e concepto artístico
O título “Xeiras” fai referencia a tres xornadas consecutivas de actividade musical, entendidas como un camiño artístico e simbólico. Coa metáfora dos camiños de auga e terra conxuga dúas dimensións. Por unha banda, o Coro presenta obras que evocan a auga en diferentes formas: o murmuro dun arroio, a sensualidade do mar mediterráneo, os ritmos da tradición afroamericana ou a espiritualidade fluvial dos textos poéticos. A ‘auga’ convértese así en símbolo de conexión, fluidez e emoción compartida.
Pola súa banda, a Orquestra de Corda propón un percorrido por territorios musicais diversos: desde as danzas populares rumanas de Bartók ata a melancolía finlandesa de Sibelius, pasando polo lirismo de Granados, os sons do tango arxentino ou a tradición oral africana. A ‘terra’ vese así como espazo de identidade, diversidade e memoria colectiva.
Este programa é unha mostra máis da aposta da Universidade de Santiago de Compostela pola cultura como motor educativo, social e identitario. “Xeiras” busca ser non só un ciclo de concertos, senón tamén un espello da diversidade sonora que habita Compostela e un convite a redescubrir a cidade a través da música.
Repertorio do Coro:
– O occhi, manza mia – Orlando di Lasso
– Esta tierra – Javier Busto / Francisco Pino
– Tres Cantigas de Pontevedra – Agustín Bertomeu
– El arroyo que murmura – Jorge Anckermann / Electo Silva
– Eres tú – Juan Carlos Calderón / Michel Schwingrober
– Lord, I want – Spiritual afroamericano / William Stickles
Repertorio da Orquestra de Corda (con colaboración do coro en dúas obras):
– P. I. Tchaikovsky: Elexía
– B. Bartók: Danzas rumanas
– J. S. Bach: Jesus bleibet meine Freude (con coro)
– J. Sibelius: Finlandia – Hino (con coro)
– E. Granados: Goyescas
– G. Gershwin: Lullaby
– A. Piazzolla / M. Diz: Contrabajeando
– Tradicional africana / M. Diz: Lala mtoto lala
Dirección e equipo artístico
Director da Orquestra: Mario Diz
Director do Coro: Julián Jesús Pérez
Pianista acompañante: Paula Gago
Profesorado convidado:
– Violíns I: Ayşe Yayuz
– Violíns II: Antía García
– Viola: Blanca Bello
– Violonchelo e Contrabaixo: Clara Martínez
