Bisbarra, 5 de novembro do 2024 – Os concellos de Trazo e Oroso veñen de recibir nova maquinaria especializada en protección medioambiental e mantemento do espazo natural, obtida a través do Fondo de Compensación Ambiental.
A maquinaria da que xa dispoñen Trazo e Oroso inclúe unha desbrozadora e unha trituradora, cun investimento total de máis de 55.000 euros. Desta cantidade, o Fondo de Compensación asume o 80% a través desta axuda de concorrencia agrupada.
Con esta nova dotación, Oroso e Trazo reforza a súa capacidade para realizar labores de conservación do territorio, fomentando un entorno máis limpo e seguro para a cidadanía e contribuíndo ao equilibrio ambiental da comarca.
A maquinaria permitirá optimizar os recursos destinados a estas tarefas e mellorar a eficiencia nas actuacións de protección ambiental, en consonancia cos obxectivos de sostenibilidade e conservación.
Oroso e Trazo agradecen o apoio da Xunta de Galicia e a colaboración intermunicipal que fixo posible esta adquisición, e continuará traballando en iniciativas que favorezan a sostenibilidade e a protección do medio ambiente, en beneficio de todos os veciños.
Novo aparcamento en Oroso
As obras para a creación do novo aparcadoiro disuasorio na Alameda de Góis avanzan a bo ritmo. Tras a sinatura do convenio en setembro, entre o conselleiro de Presidencia, Xustiza e Deportes, Diego Calvo, e o alcalde Álex Doval, estanse a realizar traballos que permitirán habilitar un espazo de máis de 3.000 metros cadrados con máis de 80 prazas de estacionamento.
Esta infraestrutura, financiada pola Xunta cun investimento de preto de 54.000 euros, busca ofrecerlle á veciñanza de Oroso unha solución cómoda e sostible para aparcar e compartir vehículo. Entre as prazas dispoñibles, dúas estarán reservadas para persoas con mobilidade reducida e 14 estarán habilitadas para motos.
O proxecto, que incluirá a mellora do firme e a urbanización da área, tamén contempla a instalación de bordos, marcas viarias e sinalización vertical, o que facilitará un uso ordenado e seguro do espazo. A previsión é que o novo aparcadoiro estea dispoñible antes de finalizar o ano, contribuíndo á redución do tráfico nas contornas urbanas e ao fomento da mobilidade sostible.
O alcalde Álex Doval agradeceu á Xunta a súa colaboración e destacou a importancia de promover alternativas de transporte máis respectuosas co medio ambiente e máis eficientes para o día a día da cidadanía.
