Oroso, 6 de agosto do 2019 – Unha temporada máis o palmarés do Oroso Tenis de Mesa é impresionante, conseguindo catro ascensos, e unha vez máis ten que renunciar a estar na máxima categoría nacional por falta de apoios económicos.
Coa pretempada xa comezada, a pleno rendemento os grupos de tecnificación preparando os próximos retos e sen case apenas descanso desde a finalización dos Campionatos de España en Tarragona, o Oroso tenis de Mesa acaba de confirmar que son 4 os ascensos alcanzados na pasada tempada: 3 a ligas nacionais e un á máxima categoría autonómica.
O Oroso Abanca de 2ª División Nacional Feminina, acababa a liga como líder do seu grupo, alcanzando así o ascenso directo á Primeira División Nacional. O equipo, formado integramente por xogadoras da casa, selaba unha magnifica campaña e a próxima tempada competirá en categoría nacional, probablemente no grupo 1.
O OrosoTM Hotel Santa Cruz, militante na máxima categoría autonómica: Primeira División Galega, alcanzou a segunda praza e esta semana a Federación Galega de Tenis de Mesa confirmaba o seu ascenso a Terceira División Nacional como mellor segundo de entre todos os grupos galegos. O equipo, formado por rapaces da canteira alcanza así un importante logro que permitirá aos máis novos do club seguir progresando e medir as súas forzas a próxima tempada xa contra xogadores de categoría nacional.
En segunda división galega, o Oroso Barbería Tije, acababa a liga regular como subcampión, e tamén recibía a boa noticia esta semana do seu ascenso á máxima categoría autonómica, polo que en setembro debutará en Primeira división Galega.
A nota agridoce foi para o OrosoTM Deporte Galego, que finalizaba a campaña como líder do seu grupo, en primeira posición tras unha impresionante campaña das perlas da canteira orosá que, no seu primeiro ano na categoría sorprendían a propios e estraños. Con todo, o club viuse, unha vez máis, obrigado a renunciar a un ascenso (lembremos que xa tivo que facelo na tempada pasada co equipo de Superdivisión Nacional Feminina, e na anterior coa participación na liga Europea e no Campionato de España). Os apoios que o club tanto solicita seguen sen chegar e decidiu priorizar ás categorías base.
Lamentablemente, unha vez máis, Oroso perde unha praza nas máximas categorías nacionais co consecuente prexuízo, non só deportivo, senón tamén económico para a hostalería e demais negocios da zona que poderían beneficiarse da visita ao concello dos mellores clubs de España.
A pesar de todo, a directiva púxose xa a preparar unha tempada que cualifican de ilusiónante polas serias opcións de ascenso coas que parten algúns dos seus equipos, e fai unha vez máis un chamamento a todas as institucións públicas e empresas privadas para que apoien un labor de xa moitos anos e que deu innumerables éxitos ao Concello. “No apartado técnico faise un gran traballo e temos xogadores que se se aposta por eles teñen un gran futuro, pero necesitan que se lles apoie máis, e que non vexan freada a súa progresión por ter que renunciar a ascensos ou a participar en competicións que eles mesmos gañáronse na mesa.”
