Bisbarra, 18 de agosto do 2022 – O concello de Oroso ven de presentar a Semana Cultural que organiza desde o vindeiro martes 23 ata o 8 de setembro.
Desde a Concellaría de Cultura de Oroso prográmanse un total de sete actividades no marco de esta semana Cultural. A primeira delas, o martes 23 de agosto, será unha excursión ao
Aquapark de Cerceda dirixida a maiores de oito anos de idade. As prazas son limitadas e o prazo de solicitude permanecerá aberto ata este venres 19 de agosto no Centro Cultural.
Ao día seguinte, o mércores 24 de agosto, a explanada da piscina municipal acollerá o espectáculo teatral para todos os públicos “A tropa do doutor milagre”, a cargo de Urdime.
Dous días máis tarde, o venres 26, a Praza de Isaac Díaz Pardo será o escenario do espectáculo de música e movemento para todos os públicos “Pisando ovos – Give it a Spain”, incluido no programa “Cultura no Camiño”.
O martes 30 de agosto, Magín Blanco ofrecerá o espectáculo musical “A banda das apertas” na explanada da piscina, tamén ao abeiro de “Cultura no Camiño” e dirixido a todos os públicos.
Xa no mes de setembro, o venres 2 a Praza de Isaac Díaz Pardo acollerá a actuación musical de Cora Velasco, incluida no programa “Cultura no Camiño”, mentres que o martes 6 de setembro será Marta Alonso Tejada quen ofreza o espectáculo de danza e humor “Sofá” na explanada da piscina.
Por último, o xoves 8 de setembro, Urdime programará a obra teatral “Muiñada”, para todos os públicos, no Parque do Carboeiro.