Bisbarra, 23 de setembro do 2024 – O Psicotroita regresa a Sigüeiro coa súa novena edición o vindeiro 28 de setembro, mantendo o seu estilo desenfadado e familiar.
O Psicotroita consolidouse ao longo dos anos como un referente entre os festivais da zona, cunha afluencia de máis de 1000 persoas por edición. O evento, que terá lugar na área recreativa do Paseo do Carboeiro en Sigüeiro, contará cunha ampla programación musical que abranguerá dende bandas galegas ata grupos internacionais.
A música en directo será a protagonista do Psicotroita, cun estilo pop, rock e garage, coa participación de artistas como Airbag, Rolando Bruno, King Salami & The Cumberland Three, Samesugas, e moitos máis. O festival asegura ademais un ambiente cómodo, con zonas de descanso á sombra, gastronomía variada que inclúe opcións veganas e sen glute, e espazos adecuados para mascotas.
Un dos valores fundamentais do Psicotroita é o seu respecto polo entorno natural que o rodea: unha área recreativa a carón do Río Carboeiro en Sigüeiro. O festival promove o uso de ecovasos reutilizables a un custo simbólico que se pode reembolsar, aínda que moitos asistentes optan por gardalo como recordo. A combinación de boa música e sustentabilidade converte o Psicotroita nun evento único que coida tanto do medio ambiente como dos seus asistentes.
O festival comezará ás 13:00 e prolongarase ata a 1:00 da madrugada, respectando sempre os horarios de descanso da vila. A entrada será totalmente gratuíta, consolidando o Psicotroita como unha cita imprescindible para os amantes da música e a cultura na contorna.
A presentación do cartel do festival fíxose hoxe no Paseo do Carboeiro en presencia do alcalde de Oroso, Alex Doval, e do Director Xeral de Cultura da Consellería de Cultura, Lingua e Xuventude da Xunta de Galicia, Anxo Lorenzo, como patrocinador do evento.
Saúdos do Departamento de Comunicación do Concello de Oroso.
