Oroso, 2 de xuño do 2022 – A Asociación de Concellos do Camiño Inglés acordou o aprazamento da quinta edición de Primavera no Camiño Inglés.
A quinta edición de Primavera no Camiño estaba prevista para este sábado 4 de xuño en Sigüeiro (Oroso). Unha iniciativa que terá lugar no mesmo emprazamento o vindeiro domingo 12 de xuño.
A Asociación de Concellos do Camiño Inglés tomou esta decisión para garantir a seguridade tanto das persoas que ían estar presentes en representación dos 18 concellos participantes como do público asistente.
As pésimas previsións meteorolóxicas, para este sábado, alertan de fortes choivas con posibilidade de aparato eléctrico. Esta decisión foi corroborada coa Deputación da Coruña e o Concello de Oroso, colaboradores na iniciativa.
A Asociación de Concellos do Camiño Inglés lamenta as molestias que este aprazamento poida causar pero entende que é a mellor solución para que este encontro de municipios que é a Primavera no Camiño Inglés se poida desenvolver nas mellores condicións posibles. Nos próximos días darase a coñecer a programación para o domingo 12 de xuño, que se prevé que sexa moi similar á actual.
