Un pleno extraordinario aprobou o convenio que permitirá que a Deputación da Coruña licite a obra de reforma da avenida da Grabanxa e que supón un investimento de 900.000 euros.
Oroso leva moito tempo na procura dunha mellora da avenida da Grabanxa. Desde a anterior lexislatura o goberno municipal, o de entón e o actual, buscan fondos para unha das vías principais de Sigüeiro.
Ao longo dos últimos anos mantivéronse reunións coa Deputación, a Xunta de Galicia, e mesmo a Delegación do goberno, como podemos ver nos artigos que fomos publicando sobre este tema https://tinyurl.com/22k7bu3m .
O último pleno extraordinario municipal, aprobou por unanimidade de todos os grupos da Corporación, o convenio de colaboración coa Deputación da Coruña para acometer a esperada remodelación integral da Avenida da Grabanxa.
Este acordo supón un paso definitivo para a execución do proxecto xa aprobado e que contará con financiamento da institución provincial. A licitación da obra por parte da Deputación é agora o seguinte paso, e desde o goberno local confían en que se tramite coa maior urxencia posible, dada a relevancia desta actuación para a veciñanza.
Trátase dunha intervención que permitirá modernizar unha das arterias principais do municipio, mellorar a seguridade viaria e favorecer a accesibilidade, así como a integración paisaxística da vía, transformando de maneira significativa a entrada ao núcleo urbano.
A colaboración tanto de Augas de Galicia, dependente da Xunta de Galicia, como da Deputación da Coruña fai posible que o Concello de Oroso poida afrontar esta actuación sen comprometer os recursos propios, exemplo de colaboración entre institucións.
O proxecto supón un investimento total próximo aos 900.000 euros, dos cales 280.000 euros serán asumidos por Augas de Galicia, correspondentes ás actuacións de saneamento e abastecemento que, en principio, tería que asumir o propio Concello.
Deste xeito, a achega da administración local queda a custo cero, mentres que o resto do financiamento correrá a cargo da Deputación da Coruña, a través do convenio aprobado.
