O equipo de goberno cualifica as contas de equilibradas, sen subas fiscais e cun investimento récord ao servizo da veciñanza.
O Concello de Oroso vén de presentar o proxecto de orzamentos municipais para o exercicio 2026. Segundo o equipo de goberno do popular Alex Doval trátanse dunhas contas que destacan polo seu equilibrio económico, a estabilidade fiscal e un ambicioso esforzo investidor.
O documento mantén o equilibrio orzamentario e consolida “unha xestión dos recursos responsable, sen incremento da débeda nin do gasto corrente”. O Concello mantén a mesma presión fiscal que no exercicio anterior, o que garante servizos públicos de calidade sen cargar máis aos contribuíntes. O documento presenta un incremento no orzamento con respecto ao ano pasado cercao ao 7%, preto dos 9M de euros.
O goberno local non aplicará ningunha subida na taxa de recollida de lixo e asumirá directamente o incremento doutras tarifas, como a da auga, derivadas de actualizacións alleas á administración municipal. O obxectivo é “protexer o peto das familias orosás e impedir que as subas repercutan no cidadán”.
Máis investimento
O proxecto contempla 1,9 millóns de euros en investimento real, o que supón un aumento do 21% respecto ao ano anterior e representa un de cada cinco euros do total do orzamento municipal. As principais liñas destinaranse á mellora e posta en valor dos espazos públicos, á cohesión social e participación cidadá, e á reparación, modernización e mantemento das infraestruturas municipais.
O alcalde, Alex Doval, explica que “Estes orzamentos reflicten un Concello que xestiona con rigor e visión de futuro, que protexe ás familias e continúa investindo en mellorar o noso día a día”. Destacou tamén que “cada euro está pensado para seguir avanzando e para que Oroso continúe sendo un lugar mellor para vivir, traballar e convivir, demostrando que estamos na boa dirección”.
Se se engaden as aportacións pendentes de proxectos xa comprometidos que se executarán directamente pola Xunta de Galicia e a Deputación da Coruña, o volume global de investimento superará os 3,3 millóns de euros, situando a 2026 como un dos exercicios con maior capacidade inversora dos últimos anos.
O Concello subliña que esta suma de esforzos institucionais multiplicará o impacto positivo sobre o territorio, con actuacións que beneficiarán directamente ás parroquias, ao tecido económico local e á veciñanza no seu conxunto.
Con estas contas, Oroso reafírmase como “un Concello solvente, previsor e comprometido co progreso, que mantén a estabilidade económica, evita subas fiscais e segue a investir con criterio, sentido común e visión de futuro”.
