Bisbarra, 12 de xullo do 2022 – O alcalde de Oroso, Luis Rey, vén de anunciar que nos vindeiros meses realizarán varias actuacións de mellora de viais na parroquia de Senra cun investimento global de 250.000 euros.
A actuación máis relevante en Senra consistirá na dotación de aglomerado na pista Baiuca Requeixo, cun importe de 160.000 euros, seguida do asfaltado da pista do Formigueiro á estrada da Deputación (40.000 euros), o asfaltado dunha pista en Arderís (30.000 euros) e a mellora da pista das Eiras ata a estrada.
O rexedor local xa avanzara a próxima execución destas obras durante unha reunión que mantivo hai días cos veciños e veciñas de Senra, acompañado polos membros do goberno. “Foi un dos encontros que estou a manter como alcalde coa veciñanza de todas as parroquias para coñecer de preto as súas necesidades e peticións e explicarlle as actuación específicas que temos previsto acometer na súa zona”.
Por outra parte, o rexedor local tamén supervisou nos últimos días o remate dos traballos acometidos nas últimas semanas na pista de Eirís, na parroquia de Cardama, na que se mellorou o pavimento e se incrementou a seguridade vial.
